Россия президенти бўлишдан анча аввал Владимир Путин 16 йил СССР давлат хавфсизлик қўмитасида фаолият юритган. Business Insider унинг хизмат давридан асосий фактларни келтириб ўтди.
Совуқ уруш аллақачон тугаб бўлган, бироқ Россия разведкаси ҳақидаги янгиликлар ҳануз Америка ОАВнинг биринчи саҳифаларидан жой олиб келади.
Россия Демократик партия қўмитасининг электрон почтасини бузиб киришда ва амалдаги президент Дональд Трампнинг сайловларда ғолиб бўлишига йўналтирилган бошқа акцияларда айбланади. ОАВ шунингдек Россияни ижтимоий тармоқлардаги қатор сиёсий гуруҳлар ва реклама кампаниялар ортида турганликда гумон қилади, махсус прокурор Роберт Мюллер эса Москва билан алоқадорлик бўйича Трамп кампаниясининг собиқ бошқарувчиси Пол Манафорт фаолиятини ўрганмоқда.
Россия президенти Владимир Путин АҚШ билан киберурушдаги иштирокини инкор этмоқда. Бошқа томондан, France Press агентлигида таъкидланишича, у бир неча маротаба Россиянинг ноёб разведкаси билан фахрланишини айтган - унинг карьераси Давлат хавфсизлик қўмитаси (ДХҚ - КГБ)да бошлангани инобатга олинса, бунинг ажабланарли жойи йўқ.
Путин ўсмирлик йилларида "Қилич ва қалқон" романи ва унинг асосида суратга олинган фильмни жуда яхши кўрган. Бу миллатчиларни енгишга ёрдам берган дадил совет разведкачисининг тарихи. Кейинроқ Путин "бир разведкачининг ўзи минглаб одамларнинг тақдирини белгилаб бериши мумкинлиги"дан ҳайратга тушганини айтган.
Путин Санкт-Петербург давлат университетининг юридик факультетида таҳсил олган. Унинг диплом иши халқаро ҳуқуқ ва савдо-сотиққа бағишланган бўлган.
У дастлаб юридик тажриба орттирмоқчи бўлган, бироқ 1975 йилда, ОТМни тугаллагач, тақсимотга кўра ДХҚга ишлашга юборилган.
