Ўзбекистон Республикаси Бош вазири ўринбосари Жамшид Қўчқоров бошчилигидаги Ўзбекистон делегацияси вакиллари Европа ва Марказий Осиё давлатлари бўйича Жаҳон Банки вице-президенти Сирил Мюллер билан учрашди.
Учрашув Вашингтонда ўтказилаётган Халқаро Валюта жамғармасининг кузги сессия давомида ташкиллаштирилди. Ўзбекистоннинг АҚШдаги элчихонаси маълумотига кўра, икки томон вакиллари ўзаро манфаатдор масалаларга алоҳида тўхталиб ўтган.
Муҳокама этилган масалалар қаторида Ўзбекистонда энергетика, ирригация ва коммунал тармоқлар бўйича янги лойиҳаларни жорий этиш, шунингдек, транспорт ва ижтимоий инфратузилмаларни янада ривожлантириш, қишлоқ хўжалиги маҳсулотларини қайта ишлаш бўйича янги имкониятлар кўриб чиқилди.
Жаҳон Банки вице-президенти жорий йил 20 сентябрда бўлиб ўтган президент Шавкат Мирзиёев ҳамда Жаҳон Банки президентининг учрашувини эслаб ўтиб, унинг аҳамияти ҳақида гапириб ўтди.
