Цукербергнинг капитали ҳар йили ўртача 9 миллиард долларга ошиб бормоқда - бироқ унинг мол-мулки рўйхатида на яхталар, на суперкарлар ва на хусусий самолётларни кўриш мумкин. BusinessInsider нима учун шундай эканига изоҳ берди.
Facebook ижтимоий тармоғининг 33 ёшли асосчиси ва раҳбари Марк Цукерберг 74 миллиард доллар маблағга эга - йиллар ўтган сари бу рақамлар ўсиб бормоқда.
Bloomberg's Billionaires Index'га кўра, Цукерберг сайёранинг энг бадавлат кишилари орасида бешинчи ўринни эгаллайди, бироқ у ҳашаматдан йироқ. Энг янги автомобиллар, дизайнерлик либослари ва курортлар бўйлаб саёҳатлар - буларнинг бари унга хос эмас.
"Ҳадя ваъдаси" филантроп ташкилоти ва Chan Zuckerberg Initiative фонди ҳаммуассиси Марк Цукерберг ўз бойлигининг катта қисмини хайрияга сафарбар этади.
Хўш, Марк Цукерберг ва Присцилла Чан ўз миллиардларини нималарга сарфлашади?
2012 йилнинг майида, яъни асос солинган кунидан саккиз йил ўтиб, Facebook Нью-Йорк фонд биржасида дебют қилди. Ўшанда бу воқеа тарихдаги энг йирик технологик IPO сифатида жаранг сочганди. Шундан буён Цукерберг активларининг соф баҳоси ўртача 9 миллиард долларга ошиб борди.
Дунёнинг энг бадавлат техномагнатларидан бири мавқеига қарамай, Цукерберг турмуш ўртоғи Присцилла Чан ва икки қизалоғи билан камтарона ҳаёт кечиради.
Цукерберг Кремний водийсининг кўплаб бошқа гигантлари каби шахсий дресс-кодини маъқул кўради. Бир қараганда, унинг кулранг футболкаларида жалб қиладиган ҳеч нарса йўқ, шундай бўлса-да, улар машҳур брендлар томонидан ишлаб чиқарилади ва кўринишига нисбатан анча қиммат - юзлаб, эҳтимол минглаб доллар.
