Мадрид учун қора кун, «Барселона»да қўлқопли Месси. Ла Лигада турнинг асосий воқеалари

30 октябрь куни «Эспаньол»-«Бетис» (1:0) ҳамда «Лас-Пальмас» - «Депортиво» (1:3) учрашуви орқали Испания чемпионатининг 10-тур учрашувлари якунланди. «Трибуна» тур якунларини сарҳисоб қилади.

Испания пойтахтида - 8

«Реал»нинг Жиронага, Каталониядаги воқеалар марказига келиши билан боғлиқ барча тревогалар бўрттирилган бўлиб чиқди. Испания нашрларининг хавотирлари ўринсиз бўлди ва Жиронада ҳеч нарса рўй бермади.

Барча воқеалар майдонда бўлиб ўтди. Майдонда сиёсатдан холи воқеалар кечди. Мадриднинг бошқа бир жамоаси «Атлетико»дан очко тортиб олган «Жирона» ўз деворлари орасида янада матонатлироқ бўлиб чиқди. Бу сафар улар ўз бўйидан бир бош баланд сакрашди. «Қаймоқранглилар»да барчаси жойида кўринаётганди, биринчи бўлимда Иско қарши ҳужумни гол билан якунлади ва жамоалар танаффусга 1:0 ҳисобидаги устунлик билан йўл олишди.

Ўйиннинг иккинчи қисми эса майдон эгалари сценарийси остида кечди. Стуани ва Порту 4 дақиқа ичида Касильи дарвозасига 2 марта тўп жойлашди.

Зидан ютқазишни истамаганди. У 3 ҳимоячили схемага ўтди, қанотлардан Марсело ва Ашраф Ҳакимини олиб, Васкес ва Асенсиони майдонга ташлади. Аммо ўйиннинг қолган дақиқаларида «Жирона» деворга айланди ва мавсумдаги иккинчи ғалабасига эришиш учун уни ҳимоя қилди. Яқиндагина мустақиллик эълон қилган Каталония Республикаси ўзининг илк катта муваффақиятини нишонлади.

«Реал» 1990 йилдан буён илк марта дебютантга қарши учрашувни бой берди. Роналду ва Бензема яна голсиз майдонни тарк этди.

Бир кун илгари Бильбаода ўз ўйинида ғалаба қозонган «Барселона» турнир жадвалида «қаймоқранглилар»дан 8 очко олдинга ўтиб кетди. Ҳали қишгача узоқ, аммо Мадридга октябрдаёқ қиш келди, дераза ортида - 8 даража.

Вальверденинг қайтиши

Бильбаода 12 мавсум ўтказган (6 мавсумни футболчи сифатида ва яна 6 мавсумни «Атлетик» бош мураббийи сифатида, у 2003-05 ва 2013-17 йилларда жамоани бошқарган) Эрнесто Вальверде қадрдон шаҳарга қайтди. Қизиқ жиҳати шуки, у «Сан Мамес»да мураббий сифатидаги илк ўйинини айнан «Барселона»га қарши ўтказганди.

Вальверди турли йилларда «Эспаньол», «Валенсия» ва «Вильярреал» жамоалари билан ҳам Бильбаога келган, аммо ҳеч қайси ўйинда ғалабага эриша олмаганди (4 мағлубият ва 1 дуранг). «Барса» унинг бу салбий статистикасини яхшилаб берди, каталонлар баскларни 2:0 ҳисобида енгди. Ўйиндаги голлар Месси ва Паулиньо томонидан урилди, аммо ғалабага Марк-Андре тер Штегеннинг ҳиссаси ҳам кам бўлмади.

Бильбаодаги ўйин «Барселона»га осон кечмади. Лекин каталонияликлар жонига Мара-Андре тер Штеген бир неча марта оро кирди. Немис дарвозабони 4-5 марта жамоани муқаррар голлардан қутқариб қолди. Адурис ва компания унга тан беришди, каталониялик мухлислар уни олқишлашди: «Тер Штеген – қўлқоп кийган Месси!».

Ушбу видеоларда унинг қаҳрамонликларини кузатиш мумкин.

«Барселона» шу тариқа клуб тарихидаги энг яхши стартни қайд этди. Жамоа мавсум стартидаги 10 ўйинда 28 очко тўплади, Месси эса тўпурарлар пойгасида яққол пешқадамликни давом эттирмоқда. Каталония шу кунларда мустақиллик эълон қилган, аммо клуб бу воқеаларга нисбатан сукут сақлашни лозим топишмоқда. Улар ўз сўзларини майдонда айтишмоқда.

Годин ва «Атлетико»

Аргентиналик Серхио Агуэро, бразилиялик Фелипе Луис ва португалиялик Тиагу Мендешни бир жиҳат бирлаштириб туради, улар «Атлетико» сафида энг кўп ўйин ўтказган хорижлик футболчилардир. Энди уларнинг сафига уругвайдлик Диего Годин ҳам кирди. У шанба куни «матрасчилар» сафида 315-ўйинини ўтказди ва колумбиялик Луис Переани (314) ортда қолдирди.

Мадридликлар жамоаси бу турда мухлисларига яна бир «сюрприз» тайёрлашганди. Жамоа яна ғалаба қозона олмади - «Вильярреал»га қарши ўйин 1:1 ҳисобида якунланди. Бу эса уларнинг чемпионатдаги бешинчи дуранг натижаси бўлди. Симеоне жамоаси кейинги 7 ўйинда фақат битта ғалабага эришган (ўйинлардан 2таси Чемпионлар лигасида ва бу ўйинларда ҳам дуранг натижа қайд этилган).

«Ечилган» Дзадза

Шундай тасаввур уйғонадики, Симоне Дзадзанинг елкасида оғир тош бўлган ва у шу туфайли яхши ҳаракатлана олмаган. Энди у бу тошдан халос бўлди. Италиялик футболчи чемпионат доирасида 9та гол урди. Таққослаш учун у ўтган мавсумда 8та голга муаллифлик қилганди. У «Валенсия» тарихида қаторасига 6 ўйинда гол урган учинчи футболчига айланди. Агар у кейинги турда «Леганес» дарвозасини ҳам ишғол эта олса, «кўршапалаклар» жамоасининг афсонавий футболчиси Эдмундо Суарес томонидан 1944 йилда ўрнатилган рекордни такрорлайди.

Фақат Дзадзагина эмас, «Валенсия» ҳам бу мавсумни жуда кўтаринки руҳда ўтказмоқда. Жамоа 7 ғалаба ва 3 дуранг қайд этган ҳолда ўз тарихидаги энг яхши стартини намойиш этди. Қолаверса, қаторасига 6 учрашувдаги ғалаба клуб рекорди такрорланишидир. Футболчиларга олтин медаль топширишга ҳали эрта, аммо Испанияда чемпионлик учун янги даъвогар пайдо бўлганини барча эътироф этмоқда.

Севилья жазирамаси

Севильяда сентябрь ва октябрь ойларида 32 даража иссиқ ҳарорат кузатилмоқда. Бундай ҳавода футбол ўйнаш қийин, трибуналарда ўтириш эса ундан ҳам қийинроқ. 30 сентябрь куни «Севилья» - «Малага» учрашувида +34 даража қайд этилганди. «Рамон Санчес Писхуан»га келган ўнлаб томошабинларга тиббий хизмат кўрсатишга тўғри келди. Шундан кейин бу майдондаги ўйинларни соат 16:55дан 22:30га кўчиришга тўғри келди. «Леганес»га қарши ўйин вақти 4 кун аввал ўзгартирилган, шу туфайли ўйинга чипта олган кўплаб мухлислар режаларини ўзгартиришга улгуришмади. Натижада стадионга мухлислар ташрифи кам бўлди, лекин келганларнинг ҳеч қайсисини қуёш урмади.

Бен Йеддер ва Сарабиянинг голлари «Севилья»нинг омадсизликларига чек қўйди, бу жамоа қаторасига 3 ўйинда мағлуб бўлганди. Бу учрашувлардаги умумий тўплар нисбати - 1:10.

«Малага»нинг илк ғалабаси

«Малага» «Сельта»ни мағлубиятга учратди. Малагадаги «Ла-Росаледа» стадионида бўлиб ўтган баҳс мезбонларнинг 2:1 ҳисобидаги ғалабаси билан якунланди. Адриан Гонсалес биринчи бўлим охирларида учрашувдаги ҳисобни очди. Яго Аспас 76-дақиқада жавоб тўпини киритди. Ресио орадан етти дақиқа ўтиб пенальтини аниқ амалга оширди ва мезбонларга ғалаба келтирди.

«Малага» мусобақадаги илк ғалабасини қўлга киритди ҳамда Испания примераси турнир жадвалининг 19-ўрнида бормоқда. Энди жамоа бош мураббийи Мичел енгил тин олса бўлади.

Испания чемпионати
10-тур
«Алавес» – «Валенсия» – 1:2 (0:1)
Голлар: Дзадза, 34 (0:1). Алексис, 49 (1:1). Родриго, 66 – пенальтидан (1:2).
«Атлетико» – «Вильярреал» – 1:1 (0:0)
Голлар: Корреа, 61 (1:0). Бакка, 81 (1:1).
«Атлетик» – «Барселона» – 0:2 (0:1)
Голлар: Месси, 36 (0:1). Паулинью, 90+2 (0:2)
«Севилья» – «Леганес» – 2:1 (1:0)
Голлар: Бен Йеддер, 20 (1:0). Шимановски, 48 – пенальтидан (1:1). Сарабия, 54 (2:1).
«Хетафе» – «Реал Сосьедад» – 2:1 (0:1)
Голлар: Ойярсабаль, 5 (0:1). Анхель, 78 (1:1). Хорхе Молина, 85 – пенальтидан (2:1).
«Жирона» – «Реал» – 2:1 (0:1).
Голлар: Иско, 12 (0:1). Стуани, 54 (1:1). Порту, 58 (2:1).
«Эйбар» – «Леванте» – 2:2 (0:2)
Голлар: Моралес, 35 (0:1). Барди, 37 (0:2). Арбилья, 51 (1:2). Шарлес, 74 (2:2).
«Малага» – «Сельта» – 2:1 (1:0)
Голлар: Адриан Гонсалес, 45+2 (1:0). Аспас, 76 (1:1). Ресио, 83 – пенальтидан (2:1).
«Эспаньол» – «Бетис» – 1:0
Гол: 1:0 – 55 Морено.
«Лас-Пальмас» - «Депортиво» – 1:3
Голлар: 1:0 – 7 Реми, 1:1 – 36 Борхес, 1:2 – 54 Борхес, 1:3 – 69, пенальти Перес.