Путин собиқ иттифоқ вақтидаги қатағонларни оқлаб бўлмаслигини айтди

Россия президенти Владимир Путин собиқ иттифоқда 1930-йилларда содир этилган сиёсий  қатағонларни ҳеч қанақасига оқлаб бўлмаслигини айтди.

"Биз учун, келажак авлодлар учун бутун халқлар, қатламлар: ишчилар ва деҳқонлар, муҳандислар ва ҳарбий бошлиқлар, руҳонийлар, давлат хизматчилари, олимлар ва маданият арбоблари шафқатсиз таъқибларга мубтало этилган тарихимизнинг ўша фожиали даври ҳақида билиш ва уни ёдда сақлаш жуда муҳимдир", деб айтди Путин қатағонлар қурбонларига бағишланган "Ҳасрат девори " ёдгорлиги очилиши маросимида.

Путиннинг таъкидлашича, қатағонлар бутун халқ ва жамият учун фожиага айланган.

Ёдгорлик 30 октябрда Москвада очилди. Давлат раҳбари Москва мэри Сергей Собянин ва Москва ва бутун Рус патриархи Кирилл билан ёдгорликни айланиб чиққан ва маросимнинг бир неча меҳмонлари билан суҳбат қурган.