Каталония раҳбари лавозимидан четлаштирилган Карлес Пучдемон Бельгиядан сиёсий бошпана сўраш ниятида эмас, аксинча, у минтақа мустақиллиги учун курашни давом эттирмоқчи. Сиёсатчи Барселонани тарк этганидан сўнг, Брюсселда ўтказилган илк матбуот анжуманида иштирок этди. У ўзини Каталониянинг қонуний раҳбари деб атади ва ўз қарашини Европа жамоатчилиги эътиборига етказиш ниятида эканини билдирди.
Шунга қарамай, Испания Олий суди мамлакат прокуратурасининг мухторият парламенти раҳбарияти устидан берган мурожаатини қабул қилди. Сиёсатчилар, ўз навбатида, Каталонияда бўлажак сайловларда Пучдемон блоки кўп овоз тўплашига шубҳа қилмоқда. RT воқеалар ривожи қандай тус олиши мумкинлиги ҳақида ҳикоя қилади.
Каталониянинг Испания ҳукумати томонидан лавозимидан четлаштирилган раҳбари Карлес Пучдемон Брюсселда журналистлар олдида қилган илк чиқишида мухтор ўлка мустақилликка тинч йўл билан эришиш бўйича дастур қабул қилганини маълум қилди. У, шунингдек, Каталония мустақиллиги учун сиёсий ва тинч йўл билан курашни давом эттиришини таъкидлади.
Бундан ташқари, Пучдемон Бельгиядан сиёсий бошпана сўраш ниятида эмаслигини таъкидлади.
«Мен Бельгияга, айнан Брюсселга келишга қарор қилдим, чунки у Европа маркази. Бу ерда эркинлик ва хавфсизлик масаласида эркинроқ ҳаракатланасиз. Аммо мен сиёсий бошпана сўраш учун бу ерга келганим йўқ», — деган у. У ўзига маълум бир хавфсизлик кафолати тақдим этилса, Каталонияга қайтишини айтди.
Шу ўринда, Бельгия бош вазири Шарль Мишель Каталония собиқ раҳбарининг Брюсселга келиши уюштирилмаганини қайд этди.
«Бельгия ҳукумати Пучдемоннинг келиши учун қандай ҳаракатларни амалга оширгани йўқ. Қироллик ҳукумати Испанияда сиёсий муаммога барҳам бериш учун тинч музокаралар ўтказишга бир неча маротаба чақирган», — деган бош вазир.
Карлес Пучдемон эса, Брюсселга «Европа билан гаплашиб олиш учун» келганини таъкидламоқда.
«Мен Каталониянинг қонуний раҳбари сифатида Европа ва дунё билан Каталонияда нималар бўлаётгани ҳақида мулоқот қилиш ниятидаман. Мадрид ҳаракатлари адолат эмас, қасос билан йўғрилган», — дея таъкидлаган Пучдемон.
Агар Брюссель Испаниянинг куч ишлатиш фикрини ёқласа, бу Европа ғояларининг тамом бўлганини англатади, деб ишонч билдирмоқда Каталониянинг собиқ раҳбари.
