Microsoft компанияси Outlook ва Teams хизматлари ишида муаммолар юзага келганини маълум қилди. Носозликка ўн минглаб фойдаланувчилар, шунингдек, бошқа компаниялар ҳам дуч келди.

13 ноябр, пайшанба куни Reuters агентлиги хабар беришича, Microsoft дастурларидан фойдаланувчи ўн минглаб одамлар Outlook ва Teams каби хизматлар ишидаги узилишлардан жабр кўрган. Носозлик беш соатдан ортиқ давом этган.

Муаммолар Copilot сунъий интеллект ёрдамчиси фаолиятида ҳам кузатилган. Интернет ресурслари ишидаги узилишлар ҳақида фойдаланувчилар шикоятларини кузатиб борувчи Downdetector портали маълумотларига кўра, Microsoft сервисларидаги носозлик дунёнинг 74 та мамлакат ва ҳудудидаги фойдаланувчиларга таъсир қилган.

«Ҳозирда биз Шимолий ва Жанубий Америкадаги фойдаланувчилар турли уланиш усулларидан фойдаланганда Exchange Online электрон почта қутиларига кира олмаётгани ҳақидаги хабарларни ўрганмоқдамиз», — дейилади Microsoft 365 Status саҳифасининг X ижтимоий тармоғидаги баёнотида.

Кейинроқ компания Microsoft 365 хизматларига уланиш билан боғлиқ муаммолар бошқа ҳудудлардаги фойдаланувчиларда ҳам юзага келиши мумкинлигини маълум қилди.

Microsoft маълумотларига кўра, айрим ҳудудларда инфратузилмага тушаётган юклама ортиши сабабли хизматлардан фойдаланиш имконияти чекланган. Бироқ компания хабарларидан келиб чиқишича, бу ҳолат интернет трафигининг кўпайиши билан боғлиқ бўлмаган.

Муаммони бартараф этиш учун Microsoft маълумотлар оқимини муқобил йўналишларга ўтказган. Шундан сўнг компания тизимлар фаолияти босқичма-босқич тикланаётганини қайд этган.

Microsoft’даги носозлик бошқа компанияларга ҳам таъсир қилди

Reuters таъкидлашича, Microsoft иловаларидаги оммавий узилиш бошқа компаниялар фаолиятига ҳам салбий таъсир кўрсатган.

Хусусан, электр юк машиналари ишлаб чиқарувчи Workhorse Group компанияси дастурий таъминот билан боғлиқ муаммолар туфайли чораклик молиявий ҳисоботи тақдимотини 16 ноябрга қолдирган.

Фойдаланувчиларнинг электрон почта ва бошқа хизматларга кира олмаслигига сабаб бўлган носозлик OpenAI ва Anthropic компаниялари фойдаланадиган Microsoft 365 компонентларига ҳам таъсир қилган.