ОПЕКга янги президент раҳбарлик қилади

ОПЕКга январдан бошлаб БАА энергетика вазири Суҳаил ал-Мазруий президентлик қилади. Бу ҳақда ОПЕКнинг амалдаги президенти, Саудия Арабистони энергетика вазири Холид ал-Фалиҳ маълум қилди.

“Менинг ОПЕК президенти лавозимидаги муддатим якунланмоқда ва Суҳаил ал-Мазруий бир овоздан ОПЕКнинг кейинги анжумаларига президент этиб сайланди. У ўз мажбуриятларини 2018 йил 1 январдан бажаришни бошлайди”, деб маълум қилди ал-Фалиҳ матбуот анжумани вақтида.   

ОПЕК+ келишувида иштирок этган нефть қазиб олувчи давлатлар 30 ноябрдаги учрашувда нефть қазиб олиш ҳажмини қисқартириш бўйича келишувни яна 9 ойга – 2018 йил охиригача узайтиришга келишиб олишди. 

ОПЕКга кирувчи ва унга кирмайдиган давлатлар (ОПЕК+) 2016 йил охирида Венада нефть қазиб олиш ҳажмини умумий ҳисобда кунига 1,8 млн баррелга қисқартиришга келишиб олишганди. Келишув 2017 йилнинг биринчи ярим йиллигига тузилган эди, май ойида эса яна 9 ойга – 2018 йил март ойи охиригача узайтирилганди.