Ўзбекистонда қиш мавсуми ҳукм сурмоқда. Бу эса автомобиль эгаларига турли хил ташвишларни келтириб чиқаради. Хусусан, қишки шиналар харид қилиш, двигатель антифризини алмаштириш, аккумуляторни яна бир бор кўздан кечириш. Ойналарнинг буғланиши ҳам ҳайдовчиларнинг асабига тегадиган жиҳатлардан биридир.
GM Uzbekistan альянсининг ижтимоий тармоғида антифриз ва ойналар буғланишига қарши ўз тавсиялари эълон қилинди. Даставвал ойналар буғланиши ҳақида.
«Машинангиз ойналари буғланишига қарши қандай курашиш лозим?»
Ойналарнинг буғланиши аксарият ҳайдовчиларнинг муаммоси саналади, айниқса қишки мавсумда. Бугун «GM Uzbekistan’дан маслаҳатлар» рукни орқали автомобилингиз ойналарининг буғланишидан қутилишнинг 4 хил усулини бохабар бўласиз!
1-усул. Ойналарга ҳаво юбориб тозалаш усулини ёқинг. Дефлекторлардан ҳаво оқимини ойналарга йўналтиринг ҳамда ҳароратни кўтаринг. Агар автомобилда кондиционер бўлса у бир неча дақиқада ҳавони қуритади.
2-усул. Салонни шамоллатинг. Салонни шамоллатиш ички ва ташқи ҳарорат ўртасидаги фарқни мўътадиллаштириш имконини беради, бу эса ойналар буғланишини бартараф этишга хизмат қилади.
3-усул. Буғга қарши суюқликни қўлланг. Бозорда буғга қарши суюқликларнинг турли хили мавжуд. Улар ойнада таъсир принципи сезилмайдиган қоплама ҳосил қилади. Бу эса сув томчиларининг юзага келишига тўсқинлик қилади. Бунинг учун уни пуркаб ойналарни юмшоқ матодан бўлган салфетка билан артиш кифоя.
4-усул. Буғга қарши қоплама. Ойналарни оптика ва мотоцикл шлемлари ёки савдо ускуналарида ишлатиладиган махсус плёнка билан қоплаш ноодатий ва шу билан бирга узоқ муддатли ечим саналади.
Энди двигателни совутиш тизими ҳақида. Хўш, автомобиль эгаси антифриз ҳақида нималарни билиши лозим?
Биринчи галда ёдингизга солиб ўтиш керакки, автомобиль антифризи - бу двигателни совитиш тизимининг энг асосий таркибий қисмларидан бири саналади. У бир умрлик эмас, автомобилнинг бошқа суюқликлари сингари антифризни ҳам алмаштириб туриш лозим.
Matiz, Damas, Labo русумли автомобилларнинг антифризини алмаштириш жараёни ҳар 40 000 километрда, Captiva, Malibu, Orlando моделларида эса сал камроқ - ҳар 24 000 километр ёки 5 йилда бир марта ўтказилиши керак.
