18 декабрь оқшомида бўлиб ўтган «Малага» ва «Бетис» учрашуви Испания чемпионатида 16-тур ўйинларига якун ясаб берди. «Трибуна» турнинг асосий воқеаларига тўхталиб ўтади.
«Барселона» класико арафасида «муштларини машқ қилди»
Эрнесто Вальверде шогирдлари мавсумнинг биринчи даврасидаги класикога тайёрланишмоқда. 23 декабрда кечадиган йил ўйинидан олдин каталонияликлар «Депортиво»ни қабул қилди, мадридликлар бу ҳафтада БААда бўлиб ўтган клублар ўртасидаги жаҳон чемпионатида иштирок этди.
Галисияликларга қарши ўйинда Месси ва жамоа йирик ҳисобда ғалаба қозонди - 4:0. Аммо бу ўйин ҳам можаросиз ўтмади.
«Камп Ноу»га келган мухлислар Мессининг нақадар омадсизлигига гувоҳ бўлишди: аргентиналик футболчи 4 марта дарвоза тўсинлари ва устунини нишонга олди. Бу ҳам етмагандек, у пенальтидан ҳам гол ура олмади, унинг зарбасини Рубен Мартинес қайтарди.
Бу ўйинда Мессининг ўрнига Луис Суарес ва Паулиньо иккитадан гол уришди. Бразилиялик футболчи ўйиндаги энг омадли футболчига айланди, у Месси ва Альбанинг зарбалари дарвоза устунларидан қайтгач икки гол урди. Уругвайлик ҳужумчининг эса тоза голи ҳисобга олинмади: Суарес рабона усулида тўпни дарвозага йўллаган, дарвозабон тўпни дарвоза ичидан қайтарганди. Ҳакам эса голни қайд этмади ва навбатдаги норозиликлар тўлқинини бошлаб берди.
Суарес рабона усулида гол урди. Ҳакам яна «Барселона»нинг тоза голини инобатга олмади
«Кўршапалаклар»нинг парвози сўнмоқда
«Эйбар» - Басклар ўлкасидаги митти жамоа. 7 минг томошабин учун мўлжалланган митти стадионга эгалик қиладиган бу жамоа охирги турларда яхши иштирок этаётганди, жамоа охирги 5 учрашувда 10 очко олганди. Мавсумни жуда кўтаринки руҳда бошлаган ва турнир жадвалида иккинчи ўриндан тушмай келаётган «Валенсия» эса аввалига «Барселона» билан дуранг ўйнади, кейин «Хетафе»га мағлуб бўлди, ўтган турда эса шубҳали пенальти эвазига «Сельта»ни мағлуб этди (2:1). «Эйбар» майдонига сафар ўйини эса «кўршапалаклар» жамоасининг қулашини давом эттирди. Ёмғир остида кечган учрашувда «Валенсия» қаторасига иккинчи сафар ўйинида ҳам мағлуб бўлди ва турнир жадвалида «Атлетико»ни ҳам олдинга ўтказиб юбориб, учинчи ўринда қолди. Энди «Барселона» билан орадаги фарқ 8 очкога етган.
