Apple 5G тармоғини қўллаб-қувватловчи янги iPhone X'ни тайёрламоқда

Фото: Visualhunt.com

Американинг Apple корпорацияси 5G тармоғини қўллаб-қувватловчи янги iPhone X флагман смартфонининг модернизация қилинган версияси ишлаб чиқарилиши ҳақида маълум қилди.

Мавжуд маълумотларга кўра, гаджетнинг қолган барча функциялари, шу жумладан икки камера, юз сканери ва ҳошиясиз дисплей iPhone X'нинг янги вариантида ҳам қолади.

Режага кўра, янги версиядаги iPhone синовларига тез орада старт берилади. Apple ишлаб чиқарувчилари флагманнинг дастурий таъминотини 5G тармоғига мослаштиришлари керак. Маълумки, Apple уларда Intel корпорациясининг махсус модемидан фойдаланади. Янги iPhone X смартфонининг жаҳон бозорига чиқиш санаси ҳозирча номаълумлигича қолмоқда.

Дастлабки маълумотларга кўра, илк 5G тармоқлари бутун дунёда 2019 йилда пайдо бўлиши кутилмоқда. Ушбу тармоқнинг кенг тарғиботи 2022 йилга мўлжалланган.