Тадбирда iPhone 18 Pro, iPhone 18 Pro Max ҳамда iPhone Ultra деб номланадиган буклама смартфон тақдим этилиши кутилмоқда. Миш-мишларга кўра, базавий iPhone 18 бу йил чиқарилмайди: компания ҳамёнбоп моделларни тақдим этишни баҳорга кўчирган.
Барча янги iPhone’лар юқори унумдорлик ва энергия самарадорлигига эга Apple A20 Pro чипида ишлайди. Pro версиялар ўзгарувчан диафрагмали янгиланган камерага эга бўлади, бироқ қолган жиҳатлари аввалги авлодникига яқин бўлиб қолади. Шу билан бирга, хотира танқислиги сабабли смартфонлар нархи ошиши башорат қилинмоқда.
Буклама iPhone компаниянинг ушбу форм-фактордаги илк қурилмаси бўлади. Унинг ташқи экранининг диагонали тахминан 5,5 дюйм, ички экрани эса 7,6 дюймни ташкил этади. Компромисслардан ҳам қочиб қутилиб бўлмади: Face ID ўрнига Touch ID пайдо бўлади, камера эса телеобъективдан маҳрум қилинади.
Шунингдек, Apple Watch Series 12 ва Apple Watch Ultra 4 ҳам тақдим этилиши кутилмоқда. Бундан ташқари, смарт уй учун янги Apple TV 4K ва янгиланган HomePod mini каби янгиликлар ҳам бўлиши мумкин. Аппарат тақдимотлари билан бир қаторда, компания iOS 27, iPadOS 27 ва macOS Golden Gate чиқиш санасини ҳам эълон қилади.
