Қойилмақом ўнлик. Қайта-қайта харид қилгингиз келадиган автомобиллар – фотожамланма

АҚШ истеъмолчилар иттифоқи ўз эгаларининг энг юқори баҳосига лойиқ топилган транспорт воситаларининг рейтингини эълон қилди, деб ёзади Forbes.

Consumer Union (АҚШ истеъмолчилар иттифоқи) нотижорат ташкилоти ўз эгалари томонидан юқори баҳоланган автомобиллар рейтингини эълон қилди. ТОП-10 ярим миллиондан ортиқ машина ичидан танлаб олинган. Транспорт воситалари қуйидаги жиҳатларига кўра танланган: бошқариш осонлиги, қулайлик, дизайн, қолдиқ қиймати, аудио ва иқлим қурилмасининг сифати. Эгаларига берилган бош савол эса «Яна худди шу автомобилни харид қилган бўлармидингиз?» бўлган.

Tesla Model S

Tesla Motors билан боғлиқ қатор машмашаларга қарамасдан, илк электрокар ҳамон омманинг фаворитлари рўйхатида турибди. Эгалари бир зарядлаш билан йўл босишнинг анча захирасига эга бўлиш, машинанинг аъло даражадаги динамиклиги ва фойдаланишдаги қулайликлари, жумладан, иккита багаж бўлмасини қайд этишган. Камчиликлари орасида йўлдаги бошқарувдан чалғитувчи олд панелдаги катта сенсор экрани ва совуқ фаслларда юриш масофасининг қисқариб кетиши тилга олинган.

Porsche 911

Афсонавий спорткар ўзининг ажойиб бошқарилиши ва динамикаси билан эгаларини хурсанд қилиши кутилган эди. Унчалик йирик бўлмаган, паст автомобилда узоқ масофага йўл босиш кишини чарчатмайди: салоннинг эргономикаси жойида, шовқин даражаси ҳам юқори эмас. Худди механик узатмалар қутиси каби пойга «завқи»ни бера оладиган автоматик узатмалар қутиси ҳам мақтовларга лойиқ кўрилган.

Chevrolet Corvette

Американча спорткар — салонга амаллаб кириб олинса-да, шиддатли ҳаракат ихлосмандлари учун. Машина шу қадар пастки, эгалари унинг ичига кириб олиш учун акробатик кўникмаларни ҳосил қилиш керак. Лекин барча ноқулайликлари ва ёмон товуш изоляциясини 650 от кучига эга двигатель босиб кетади.

Lincoln Continental

Флагман сендан нарх/сифат мутаносиблигига жуда мос келади — унинг нархи класи пастроқ баъзи рақобатчилариники сингари, салонининг безаги ва жиҳозланиши эса — премиал моделларникидан қолишмайди. 3 литрли, қуввати 400 от кучига тенг двигатель сокин ва бир маромдаги ҳаракат учун мўлжалланган. Автомобилда орқа ўриндиқдаги йўловчиларнинг қулай жойлашувига алоҳида урғу берилган.

Ford F-350

Ўзидан олдин ишлаб чиқарилган машиналарнинг энг яхши анъаналари бўлмиш ишончлилик ва юк кўтариш қобилиятини сақлаб қолган янги F-350 бунга қўшимча равишда стилли ташқи кўриниш ва вазнини камайтиришга изн берган юқори технологияларга эга. F-350 энг машаққатли шароитларда ишлай олиши билан мухлисларининг муҳаббатига сазовор бўлган.

Mazda MX-5 Miata

Родстернинг тўртинчи авлоди Mazda’нинг оригинал формуласига содиқ қолган: у ўзи сингарилар ичра энг кучли автомобиль эмас (бор-йўғри 155 от кучи), лекин у ажойиб бошқарилиш ва ёқилғини иқтисод қилиш қобилиятига эга. Таассуротларга ҳаддан ташқари шовқинли эканлиги ва ўриндиқларининг тор эканлиги раҳна солади — машина узоқ йўл босиш учун асло тўғри келмайди.

Toyota Prius

Ушбу модель ёқилғини иқтисод қилиш мақсадида ўйлаб топилган ва янги Prius буни ўзидан аввалги авлодлардан кўра яхшироқ уддалай бошлаган. Эгалари гибрид қурилманинг ўта ихчамлиги, боз устига, автомобилнинг бирмунча динамик ва қулай бўлганини қайд этишган.

Tesla Model X

Электр йўл танламас машина, аввало, футуристик ва чиройли кўринишга эга, уни ихчам ва қулай дейишга тил бормайди. «Балиқчи қуш қаноти» схемасида очилувчи йирик эшиклар кишида таассурот қолдиради, лекин уларнинг очилиш ва ёпилиши ҳаддан зиёд кўп вақтни олади. Model S га нисбатан йўловчилар учун қулайлик бир мунча пасайтирилган. Лекин нима бўлганда ҳам у дунёдаги энг тезкор кроссоверлардан саналади ва кўриниши ҳам бинойидек.

Honda Odyssey

Оилавий минивеннинг 3,5 литрли, 280 от кучига эга двигатели «хуноб» қилмайдиган автоматик узатмалар қутиси билан яхши динамикани таъминлайди. Машинани шаҳар ичида ҳам, трассада ҳам бошқариш қулай. Сиғимли салон яхши ўйланган, кўнгил очувчи тизим ҳақида ҳам шундай дейиш мумкин. Лекин машинанинг имкониятлари тўлиқ узатма йўқлиги сабабли чегараланган.

Dodge Challenger

Эски мактаблар анъанасига хос бўлган маслкар Hellcat бутловчиси билан ақлни шоширади: 6,2 литрли ички ёнув двигатели 808 от кучига эга. Американча спорткарга хос равишда модель бурилишлардан аниқ ўта олмаса-да, унга текис ва равон йўлда тенг келадигани йўқ. Бирмунча қаттиқ уланма педали ва узатмалар қутиси ричаги, шунингдек, шовқиндан ҳимояланганлиги «расво» баҳосини олган. Лекин у афсона саналади ва харидорлар барибир уни севишади.