Naked Science нашри Visual Capitalist инфографикасига таяниб хабар беришича, рейтинг Ember ташкилотининг 2024–2025 йилларга оид маълумотлари асосида тузилган.
Унда мамлакат ва ҳудудларнинг рақамли техника соҳасидаги жаҳон ишлаб чиқариш қувватларидаги улуши акс эттирилган. Кўрсаткичлар тайёр маҳсулот сотуви ёки экспорт ҳажмини эмас, айнан ишлаб чиқариш қувватларини ифодалайди.
Хитойнинг улуши қолган дунёникидан катта
Хитойнинг электроника саноати смартфон ва компютерлардан тортиб дисплейлар, босма платалар ҳамда бошқа электрон қисмларгача бўлган маҳсулотларни қамраб олади.
Мамлакатнинг 58,8 фоизлик улуши иккинчи ўриндаги Тайван кўрсаткичидан қарийб олти баравар кўп. Тайванга жаҳон ишлаб чиқариш қувватларининг 10,2 фоизи тўғри келади.
Хитойнинг ўзидаги қувватлар рейтингда келтирилган бошқа барча мамлакат ва ҳудудларнинг жами улушидан ҳам юқори.
Мақолада қайд этилишича, Хитой янги беш йиллик режаси доирасида яримўтказгичлар, сунъий интеллект ва бошқа стратегик технологияларни ривожлантиришга эътибор қаратмоқда.
Айниқса, интеграл схемалар ишлаб чиқаришнинг барча босқичлари, жумладан, чиплар тайёрлашни ривожлантириш устувор йўналиш сифатида белгиланган. Бу орқали Пекин Ғарб технологияларига қарамликни камайтиришни кўзламоқда.
2030 йилга бориб ушбу йўналишлар билан боғлиқ тармоқларнинг жами операцион тушумини 4,5 триллион долларга етказиш режалаштирилган.
Шарқий Осиёнинг тўртта етакчиси
Тайван, Жанубий Корея ва Япония биргаликда жаҳон рақамли техника ишлаб чиқариш қувватларининг 21,7 фоизига эга. Хитой билан қўшиб ҳисоблаганда, уларнинг умумий улуши 80,5 фоизга етади.
Ушбу иқтисодиётларнинг ҳар бири технологик таъминот занжирида алоҳида ўрин тутади. Тайван яримўтказгичлар ишлаб чиқариш ва электрон техникани йиғиш бўйича йирик марказлардан бири ҳисобланади.
Жанубий Корея, хусусан, яримўтказгичлар ва дисплейлар ишлаб чиқаришга ихтисослашган. Япония эса узоқ йиллар давомида шаклланган электроника саноатига эга.
Улар биргаликда чиплар, электрон қисмлар ва дисплейлар тайёрлашдан тортиб, якуний қурилмалар ишлаб чиқаришгача бўлган ўзаро боғлиқ минтақавий тизимни ташкил этади. TSMC, Foxconn, Samsung, BOE ва Sony каби йирик компанияларнинг бош қароргоҳлари ҳам шу бозорларда жойлашган.
