«Барселона»нинг мағлубиятсиз сериясига якун ясалди

Испания Кубогининг чорак финали доирасидаги илк учрашувда «Эспаньол» «Барселона»ни мағлубиятга учратди. Барселонадаги «РКДЭ — Корнелья-Эль Прат» стадионида кечган дерби баҳси майдон эгаларининг 1:0 ҳисобидаги ғалабаси билан якунланди.

Ўйиннинг 62-дақиқасида Алейкс Видаль «Эспаньол» жарима майдонига тўпни узатганида, тўп учун кураш вақтида Эстебан Гранеро Серхи Робертони қўполлик билан тўхтатиб қолди. Ўйин ҳаками Рикардо Бенгоэчеа эса «нуқта»ни кўрсатди. Аммо Лионель Месси бурчакка берган зарбани Диего Лопес қайтариб қолди.

88-дақиқада эса Марк Наварронинг пасини Оскар Мелендо тўхтатмасдан дарвоза тўрига йўллади - 1:0.

Шу тариқа, «Барселона»нинг Ла Лигадаги 21 учрашувдан иборат (барча турнирлар қўшиб ҳисобланганда 29 учрашув) мағлубиятсиз сериясига Каталония дербисида якун ясалди. 

«Барселона» охирги марта 2017 йил августида ютқазганди, ўшанда Испания Суперкубогида «Реал»га икки учрашув бой берилган (0:2, 1:3).

«Эспаньол» «Барселона»ни 2009 йилдан буён илк марта енгди.

1/4 финалнинг жавоб учрашуви 25 январь куни «Барселона» майдонида бўлиб ўтади.

Испания Кубоги
1/4 финал
Биринчи ўйинлар
Эспаньол – Барселона 1:0 (0:0, 1:0)
Гол: 1:0 – 88 Мелендо.
Эспаньол – Лопес, Дуарте, Налдо, Кариколь (Вила, 58), Лопес Сильва, Гранеро, Санчес, Хави Фуэго (Мелендо, 75), Дардер (Баптистао, 46), Марк Наварро, Морено.
Барселона – Силлессен, Вермален, Пике, Динь, Алеиш Видаль, Аленья (Суарес, 59), Серджи Роберто, Бускетс, Паулиньо (Ракитич, 54), Денис Суарес (Рафинья, 78), Месси.
Огоҳлантиришлар: Кариколь (43), Аленья (45), Альба (55), Морено (61), Ракитич (82), Вермален (84), Санчес (86), Лопес Сильва (90), Суарес (90).