Наманганда мутасаддилар Қозоғистондаги фожиада ҳалок бўлганларнинг хонадонларига кириб, таъзия билдиришди

Ўзбекистон мусулмонлари идораси раиси ўринбосари Шайх Абдулазиз Мансур, Дин ишлари бўйича қўмита раиси Ортиқбек Юсупов, Ислом цивилизацияси маркази директори Шоазим Миноваров, Наманган вилояти ҳокими Хайрулло Бозоров ва вилоят бош имом-хатиби Абдулҳай Турсуновдан иборат бир гуруҳ мутасаддилар Қозоғистонда ҳалок бўлган юртдошлар хонадонларига кириб, уларнинг оила аъзоларига таъзия билдиришди. Бу ҳақда muslim.uz сайти хабар берган. 

Уламолар ва масъуллар ҳалок бўлганларнинг оила аъзолари ҳамда яқинларининг мусибатларига шерик эканларини айтиб, республикамизнинг барча масжидларида жума намозларида дуолар қилингани ва мадрасаларда хатми Қуръонлар ўқилаётганини билдириб, ҳар қандай ёрдамга тайёр эканликларини изҳор қилишди.

Айни вақтга келиб Қозоғистоннинг Ақтўбе вилояти Ирғиз туманидаги содир бўлган фожиа оқибатида вафот этганларнинг 28 нафарининг шахси аниқланган. Уларнинг барчаси Наманган вилоятидан.