Санчессиз ўйнашни ўрганган «Арсенал» ва «Ливерпуль»нинг ўзига хос томошаси. АПЛда тур ўйинлари

«Трибуна» Англия премьер лигасининг 24-тури учрашувларига тўхталади.

Клопп яна Робин Гуд ролида

Мағлубиятсиз 18 учрашув серияси, охирги турда енгилмас «Манчестер Сити» устидан ғалаба, Фирминьо-Мане-Салоҳ триосининг ажойиб формаси ва ван Дейкнинг клуб сафида премьер-лигадаги дебюти... Турнир жадвалида энг охирги ўринда жойлашган «Суонси»га қарши ўйиндан олдин «Ливерпуль» клуби мухлислари муваффақиятдан шубҳа қилишмаётганди. Аммо «қизиллар» аутсайдерларга мағлуб бўлишнинг «ҳадисини олишган» ва энди яна «МЮ» ва «Челси»дан ортда қола бошлади.

Ўйиндаги ягона гол мерсисайдликлар жамоаси ҳимоячилари бир-бирини тушунмай қолгани оқибатида келиб чиқди. Бурчак зарбаси ижро этилган вақтда ван Дейк тўпни рақиб оёқларига ташлаб берди ва Моусон тўпни дарвозага йўллади. Танаффусдан кейин ўз жарима майдонига қамалиб олган «Суонси» дарвозасига 17 марта зарба йўлланди аммо гол бўлмади. Энди «Ливерпуль» иккинчи ўриндан 6 очко ортда қолмоқда, шунингдек, 10-ўриндаги «Уотфорд» билан 20-ўриндаги «Суонси» орасидаги фарқ ҳам 6 очко.

Энди Клопп аввалги турда «Манчестер Сити»ни доғда қолдирган бўлсада, АПЛда январь ойининг энг яхши мураббийи бўла олмаслиги мумкин. У Англияда учинчи мавсумни ўтказаётган бўлсада, ҳамон бундай совринни қўлга киритгани йўқ.

Венгер Санчессиз қолди

Шанба куни «МЮ» мустаҳкам ҳимояга эга «Бёрнли» устидан қийинчилик билан бўлсада ғалабага эришди (1:0), «Арсенал» «Кристал Пэлас» дарвозасига 22 дақиқда 4та гол урди. Аммо бу ғалабали ўйинда «Арсенал» етакчиси Алексис Санчес қатнашмаганди, у бу вақтда Манчестер томон йўлга тушганди. Ўйиндан кейин Моуриньо ҳам Венгер ҳам бу трансфер тез орада рўй беришини тасдиқлашди.

Душанба куни барчаси ҳал бўлди, Санчес «МЮ»га борди, Мхитарян «Арсенал»га келди. Бу катта сенсацион трансфер бўлди, аммо икки футболчи ҳам ўз жамоасида қола олмаслиги аллақачон маълум бўлиб улгурганди.

Рондон: Айбсиз айбдорнинг кўз ёшлари

«Эвертон» ва «Вест Бромвич» клублари ўртасидаги учрашув дуранг ҳисоб билан якунланди, бу ўйиндаги асосий воқеа голлар эмасди, «қораялоқлар» клуби ҳужумчиси Соломон Рондон ҳамда мезбонлар вакили Маккарти ўртасидаги тўқнашув бўлди. Венесуэлалик ҳужумчи зарба беришга чоғланганида ортдан етиб келиб келган рақиб футболчисининг оёқларига беихтиёр зарба бериб юборди. Натижада Маккарти мавсум охиригача сафдан чиқди, Рондон эса унга етказган оғир жароҳати туфайли кўз ёшларини тия олмади.

Азар болакайни бахтиёр қилди

«Челси» етакчиси шанба куни ажойиб ўйин ўтказди. Бельгиялик футболчи «Брайтон» дарвозасига 2та гол урди ва яна бир голга узатма берди. Энди унинг ҳисобида Франция ва Англия чемпионатларида урилган 100 гол мавжуд. Лондонликлар ўйинда 4:0 ҳисобида ғалаба қозонди, Азар эса ўйиндан кейин рақиб футболчилари билан футболка алмаштиришни истамади. Чунки, у футболкасини жажжи мухлисига атаб қўйганди. Ўйин давомида у трибунадаги болакайлардан бири «Азар, менга футболкангни берасанми?» дея ёзилган баннер кўтариб турганини кўрганди.

Гвардиола янги серия сари

Ўтган турда «Манчестер Сити» ютқазган, шу билан бирга босимдан қутилганди. Чемпионлик пойгасида яққол пешқадамлик қилаётган Хосеп Гвардиола шогирдлари бу турда «Ньюкасл»ни осонлик билан мағлуб этишди (3:1). Агуэро бу ўйинда ҳет-трик қайд этди ва «Олтин бутса» пойгасида ўнликка кирди.

Бу турда «Тоттенҳэм» «Саутҳемптон» меҳмони бўлди. Ҳарри Кейн бу ўйинда фақат битта гол урди ва жамоаси очко йўқотди (1:1), «Уотфорд» «Лестер»га мағлуб бўлиб, ўз аҳволини янада ёмонлаштирди. 3 ойдан буён ғалаба қозона олмаётган жамоа раҳбарияти португалиялик Марку Силвани истеъфога чиқариб, испаниялик Хави Гарсияни янги бош мураббий этиб тайинлади.

24-тур ўйинлари
«Брайтон» - «Челси» - 0:4 (0:2).
Голлар: Азар, 3 (0:1). Виллиан, 6 (0:2). Азар, 77 (0:3). Мозес, 89 (0:4).
«Арсенал» - «Кристал Пэлас» - 4:1 (4:0).
Голлар: Монреаль, 6 (1:0). Ивоби, 10 (2:0). Косьельни, 13 (3:0). Ляказетт, 22 (4:0). Миливоевич, 78 (4:1).
«Лестер» - «Уотфорд» - 2:0 (1:0).
Голлар: Варди, 39 - пенальти (1:0). Маҳрез, 90+1 (2:0).
«Стоук Сити» - «Ҳаддерсфилд» - 2:0 (0:0).
Голлар: Аллен, 53 (1:0). Диуф, 69 (2:0).
«Вест Ҳэм» - «Борнмут» - 1:1 (0:0).
Голлар: Фрэйзер, 71 (0:1). Эрнандес, 73 (1:1).
«Эвертон» - «Вест Бромвич» - 1:1 (0:1).
Голлар: Родригес, 7 (0:1). Ньясс, 70 (1:1).
«Бёрнли» - «Манчестер Юнайтед» - 0:1 (0:0).
Гол: Марсиял, 54.
«Манчестер Сити» - «Ньюкасл» - 3:1 (1:0).
Голлар: Агуэро, 34 (1:0). Агуэро, 63 - пенальти (2:0). Мерфи, 67 (2:1). Агуэро, 83 (3:1).
«Саутҳемптон» - «Тоттенҳэм» - 1:1 (1:1).
Голлар: Санчес, 15 - автогол (1:0). Кейн, 18 (1:1).
«Суонси» - «Ливерпуль» - 1:0 (1:0).
Гол: Моусон, 40.