АҚШ Адлия вазирлиги ФИФАдаги коррупция юзасидан суриштирув бошлади

АҚШ Адлия вазирлиги дунё спортидаги коррупция юзасидан катта ҳажмдаги суриштирув ишларини бошлади, деб хабар беради New York Times. 

Манба маълумотига кўра, ФИФА (Халқаро футбол федерацияси), ХОҚ (Халқаро Олимпия қўмитаси), ИААФ (Енгил атлетика бўйича халқаро федерация) ва АҚШ МОҚ (Миллий Олимпия қўмитаси) фаолияти жиддий тарзда ўрганиб чиқилади.

Нашрнинг таъкидлашича, Адлия вазирлиги енгил атлетика бўйича иккита жаҳон чемпионати (2019 - Доҳа, 2021 - Южин) мезбонлигини қўлга киритиш жараёнида йўл қўйилган пул ювиш, рэкет ва фирибгарликнинг эҳтимолий ҳолатларини, шунингдек, Россия томонидан 2014 йилги Олимпиада ва 2018 йилги жаҳон чемпионати мезбонлигини қўлга киритиш тафсилотларини текширувдан ўтказади.

Адлия вазирлиги ҳар бир ташкилотдан 2013 йилдан буён юритилган ҳужжатларни, гувоҳлик кўрсатмаларини талаб қилиб олган. Айнан шу йилдан сўнг АҚШ енгил атлетика бўйича жаҳон чемпионати (Южин-2021) ва Олимпиада-2028 (Лос-Анжелес) мезбонлигини қўлга киритган эди.

Нашрнинг қайд қилишича, АҚШ МОҚ бу хабарни изоҳлашни истамаган, ХОҚ сўровномага жавоб бермаган, ИААФ эса Адлия вазирлиги ташкилот билан боғланмаганини таъкидлаган.