Президент Шавкат Мирзиёевнинг тегишли қарорларига мувофиқ, Ўзбекистон мудофаа вазирига янги ўринбосарлар тайинланди.
Хусусан, полковник Зоидов Қаҳрамонжон Обиджонович — мудофаа вазирининг қуролланиш ва қуроллантириш бўйича ўринбосари лавозимига тайинланди.
Мудофаа вазирлиги матбуот хизматининг Kun.uz мухбирига маълум қилишича, вазирнинг қуролланиш ва қуроллантириш бўйича ўринбосари лавозими вакант бўлган. Қаҳрамонжон Зоидов тайинловга қадар Ўзбекистон Республикаси ҳарбий хавфсизлик ва мудофаа университетининг Қуруқликдаги қўшинлар институти бошлиғи лавозимида фаолият олиб борган.
Шунингдек, адлия полковниги Муратов Жаҳонгир Дилшодович — мудофаа вазирининг комплаенс ва коррупцияга қарши ички назорат бўйича ўринбосари лавозимига тайинланди.
Жаҳонгир Муратов тайинловга қадар Ўзбекистон Республикаси Ҳарбий прокурорининг биринчи ўринбосари лавозимида фаолият олиб борган.
Мудофаа вазирининг комплаенс ва коррупцияга қарши ички назорат бўйича ўринбосари лавозими эса янги жорий қилинди.
