Охирги кундаги трансферлар: «Арсенал»да ҳаммаси жойида, «Сити» хатога йўл қўймади
|21:30 / 01.02.201823 9539 мин
31 январь куни қишки трансферлар даричаси ёпилди. Дедлайн арафасида жамоалар кутилган ва кутилмаган трансферларни амалга оширишди. Доимгидек бу сафар ҳам инглиз клублари фаоллик кўрсатишди.
Дедлайннинг асосий трансферлари: 1. Пьер-Эмерик Обамеянг. «Боруссия»дан «Арсенал»га 63 млн евро эвазига; 2. Оливье Жиру. «Арсенал»дан «Челси»га 20 млн евро эвазига; 3. Лукас Моура. «ПСЖ»дан «Тоттенҳэм»га 28,4 млн евро эвазига; 4. Миши Батшуайи. «Челси»дан «Боруссия»га мавсум охиригача ижарага (1,5 млн евро); 5. Марк Бартра. «Боруссия»дан «Бетис»га 10,5 млн евро эвазига; 6. Элиаким Мангаля. «Манчестер Сити»дан «Эвертон»га мавсум охиригача ижарага; 7. Ислам Слимани. «Лестер»дан «Нюкасл»га ижарага; 8. Андре Айю. «Вест Ҳэм»дан «Суонси»га 22,8 млн евро эвазига; 9. Папа Ндиайе. «Галатасарой»дан «Сток Сити»га 16 млн евро эвазига; 10. Софьян Ханни. «Андерлехт»дан «Спартак»ка 8 млн евро эвазига.
Пьер-Эмерик Обамеянг «Арсенал»га: кўринишидан, «Арсенал» ушбу трансферни режалаштирмаганди, аммо ҳужумда супертоп жуфтлик ҳосил қилиш режаси ўта жозибали чиқиб қолди. Аслида бундай йўл тутиш – арсеналча эмас. Лекин энди «Арсенал»да ван Персининг гуллаган даврларидан бери илк марта ҳужум чизиғи ваҳимали кўриниш олмоқда.
Фото: Arsenal
Лекин бир жиҳати борки, Обамеянг «Арсенал»га Чемпионлар лигаси йўлланмаси учун ягона имконга айланаётган Европа Лигаси ўйинларида қатнаша олмайди. Венгер турнирга Генрих Мхитарянни заявка қилишга қарор қилган (у жорий мавсумда еврокубокларда ўйнаб қўйган икки футболчидан фақат биринигина турнирга заявка қилиши мумкин эди).
Мавзуга оид
Габонлик ҳужумчи жорий мавсумда кўп фойда келтирмаслиги мумкин, аммо кейинги мавсумда Обамеянг, Ляказетт, Мхитарян ва Ўзилдан иборат ҳужум тўртлиги ҳар қандай рақибга даҳшат сола олади!
Лукас Моура «Тоттенҳэм»га: Почеттино кўп марта ўзига шундай типдаги футболчи кераклигини айтиб келарди. «Бизга тўғридан ҳужум қила оладиган футболчи керак. Эриксен, Сон, Ламела ва бошқаларга тўпни қулай етказиб бера оладиганлар керак. Бизга рақиб ҳимоя чизиғини «буза оладиган» футболчи керак». Маурисио ўзига Садьо Мане каби футболчи кераклигини айтарди ва энди шундай футболчига эга бўлди.
Фото: Sky Sport
Бироз вақт муқаддам аргентиналик мутахассис бундай футболчи сиймосини Мусса Сиссокода кўрганди, аммо француз футболчининг биринчи мавсуми жуда ёмон кечди, ҳозир у яхши ўйнай бошлади, аммо бошқа ролда: Почеттино ундан қарши ҳужумларда самаралироқ фойдаланмоқда. Моура – жисмонан етук футболчи, энди уни ўргатиш ва унинг салоҳиятини тўғри йўналтира олиш керак.
Почеттино бундай иш билан машғул бўлишни ёқтиради.
Оливье Жиру «Челси»да: Конте барибир ҳужумчига эга бўлдие. Оливье у истаган ҳужумчи бўлиб чиқди – қолаверса, унинг номзоди Крауч, Кэррол, Льоренте ва Соломон Рондондан яхшироқ эди. Франциялик футболчи Джекодан фарқли равишда 1,5 йиллик шартнома тузишга рози бўлди.
Фото: BBC Sport
Миши Батшуайи «Дортмунд»да: «Боруссия» ҳужумчига муҳтож эди. Шюррле марказий ҳужумчи ролини бажара олмасди. Клуб музокараларда қатъий позицияда туриб олди: улар ўрнига муносиб ҳужумчи топилмас, Обамеянгни 63 миллион еврога ҳам бермоқчи эмасдилар.
Фото: Borussia Dortmund
Батшуайи – Обамеянг даражасидаги ҳужумчи эмас, аммо «Дортмунд» сафидаги ва трансферлар бозоридаги бошқа бўш ҳужумчилардан анча яхшироқ. Конте Мишига ишонч билдирмади ва уни фақат мажбур бўлганида ўйнатди. Шунга қарамасдан, бельгиялик бу ёш футболчи мавсум ярмига келиб барча турнирлар доирасидаги ўйинларда 10та гол уриб улгурди. Амалда Батшуайи каби ҳужумчини барча мураббийлар қадрлашади, аммо Контенинг талаблари бошқача экан.
Марк Бартра «Бетис»да: Кике Сетьен жамоаси учун муҳим инвестиция. Ўтган мавсумда у «Лас-Пальмас»даги йигитларни тўп билан муомала қилишга ўргатганди. Унинг шогирдлари Ла Лига ўйинларда тўпга эгалик қилиш бўйича иккинчи энг яхши кўрсаткични қайд этишганди («Барселона»дан кейинги иккинчи, «Реал»дан олдин).
Фото: Betis
Унинг «Бетис»и ҳам шу услубда ҳаракатланмоқда ва юқоридаги кўрсаткич бўйича чемпионатда кучли бешликда. Бундай футбол асоси эса – дарвозадан бошлаб пас бериб ўйнашдир. Аммо ҳимоядан пас билан чиқишда хатолар кузатилаётганди – айниқса Зухаир Феддал томонидан.
«Барселона» академияси тарбияланувчиси ҳисобланмиш Бартра бундай ўйин кўрсатиш борасида «Бетис»нинг ҳар қандай футболчисидан устун. У клуб учун идеал вариант эди, Сетьен – эса Марк учун ўтган мавсумда «Боруссия»даги нохушликлардан кейин энг керакли мутахассис.
Элиаким Мангаля «Эвертон»да: Лапортнинг трансфери «Сити»га Мангаляни қўйиб юборишга имкон яратиб берди, у жамоадаги энг кучсиз футболчи эди, айниқса тўп билан муомала қилиш борасида. У аҳён-аҳёнда майдонга тушса ҳам рақиблар унинг камчиликларидан унумли фойдаланишди. Пеп жамоасида бундай футболчига ҳеч қандай имконият йўқ эди.
Фото: Everton
Мангаля «Эвертон»да рақобатга бардош бериши ҳам қийин: бу ерда ҳам тажрибали ҳимоячилар жамланган.
Эҳтимол, Мангаляни янги жамоасида кутилмаган рол кутаётгандир. Лейтон Бейнс жароҳатда, «Эвертон»да эса чап оёқда яхши ҳаракатланувчи бошқа ҳимоячи йўқ. Эллардайс унинг шу устунлигидан фойдаланишни режалаштирган бўлиши мумкин, аслида марказда ҳимояланувчи Мангаляни чап қанотда ўйнатиш ҳам мумкин.
Ислам Слимани «Лестер»дан «Ньюкасл»га: Клод Пюэль ҳужум чизиғи схемасини ўзгартирди: энди «Лестер» 4-4-2 ўрнига 4-2-3-1 схемасидан фойдаланмоқда. Варди – асосий таркибнинг алмашмас ҳужумчиси, унинг ортида Демерэй Грэй ёки Маҳрез (Окадзаки ҳам бор) ҳаракатланади. Слимани бундай ролни бажара олмади, Бенитесга эса ҳужумчи керак эди. Жазоирлик бу футболчи Хоселу ўрнига жамоанинг марказий ҳужумчисига айланади.
Барбод бўлган трансфер
Риёз Маҳрез «Манчестер Сити»га ўта олмади: «Сити» Лерой Санени йўқотгач (у 7 ҳафтага сафдан чиқди) зудлик билан унинг ўрнига футболчи қидира бошлади. Гвардиола биринчи эътиборини айнан жазоирлик футболчига қаратганди.
Манчестерликлар унинг трансфери учун 3 марта таклиф йўллашди - 55, 60 ва 65 миллион фунтлик – АПЛда чемпионликни деярли ҳал қилган ва Чемпионлар лигасида «Базель»га қарши осон ўйинлар олдида турган жамоа бунча катта маблағ сарфлашига ҳожат йўқ эди. Аммо «Лестер» ўжарлик билан Маҳрез учун 95 млн фунт талаб қилиб туриб олди ва барчасидан қуруқ қолди.
Фото: Reuters
«Сити» катта харажат қилишдан сақланиб қолди, «Лестер» эса можаро гирдобида қолди. Ўзини трансферга қўйишларини сўраган Маҳрез Манчестерга кета олмагач, жамоага бойкот эълон қилди. Энди у «Лестер» сафида ўйнашни истамаяпти.
