Қайси давлатда қайси мессенжер етакчилик қилмоқда?

Хабарлар алмашиш иловалари бозорида аввалгидек WhatsApp ва Facebook мессенжерлари гигантлари етакчилик қилмоқда. Бу икки мессенжер биргаликда 168 мамлакатда 1-ўринни эгаллаб, дунё аҳолиси энг кўп фойдаланувчи мессенжер иловаларининг 89 фоизини ташкил қилади. Similarweb сайти Hootsuite ҳамда We Are Social агентлигининг мессенжерлар бўйича тадқиқот ҳисоботини тақдим этди.

WhatsApp Messenger иловасининг ўзи 104 (2016 йилда 107 мамлакатда) мамлакатда энг кўп фойдаланилувчи мессенжер сифатида 1-ўринда қайд этилган. У 45 мамлакатда 90 фоиздан ортиқ қурилмага юкланган.

Facebook Messenger эса 64 мамлакатда (2016 йил 58 мамлакатда) етакчилик қилмоқда.

Бундан ташқари, 10 мамлакатда - Viber мессенжери, 3 мамлакатда эса - Line топ-илова ҳисобланиши маълум қилинди. Шу билан бирга мессенжерлар харитасида Telegram, WeChat ҳамда KakaoTalk номлари ҳам қайд этилган.

Янги imo мессенжери Ўзбекистон ва Туркманистон аҳолиси томонидан фаол фойдаланиши таъкидланган. Уч илова эса доимий рейтингдан тушиб қолган - Skype, Zalo ва BBM.