БМТнинг Озиқ-овқат ва қишлоқ хўжалиги ташкилоти (FAO) маълумотлари асосида Our World in Data платформасида 2025 йилда ўрмон майдони энг катта бўлган давлатлар кўрсаткичлари эълон қилинди.

Маълумотларга кўра, Россия 832,6 млн гектар ўрмон майдони билан дунёда биринчи ўринда туради. Бу сайёрадаги жами ўрмон майдонининг қарийб бешдан бир қисми — 20,1 фоизига тенг.

Иккинчи ўринда Бразилия қайд этилган — 486,1 млн гектар. Канадада эса 368,8 млн гектар ўрмон мавжуд.

Кейинги ўринларни АҚШ — 308,9 млн гектар ва Хитой — 227,2 млн гектар билан эгаллаган.

Шунингдек, энг йирик ўрмон майдонига эга давлатлар қаторига Конго Демократик Республикаси — 139,2 млн гектар, Австралия — 133,6 млн гектар, Индонезия — 96 млн гектар, Ҳиндистон — 72,7 млн гектар ва Перу — 67,2 млн гектар билан кирган.

Кейинги поғоналарда Мексика — 66,3 млн гектар, Ангола — 63,3 млн гектар, Колумбия — 59,5 млн гектар, Боливия — 54,4 млн гектар ва Венесуэла — 47,1 млн гектар жойлашган.

Россияда ўрмон майдонининг катталиги мамлакат географияси билан боғлиқ. Унинг катта қисми Сибирь бўйлаб чўзилган улкан бореал, яъни тайга ўрмонларидан иборат.

FAO маълумотларига кўра, дунёдаги ўрмонларнинг умумий майдони 4 млрд гектардан ошади ва улар сайёра қуруқлик майдонининг 32 фоизини эгаллайди. Россия, Бразилия, Канада, АҚШ ва Хитойнинг ўзига дунё ўрмонларининг ярмидан кўпи тўғри келади.