Visual Capitalist тақдим этган инфографикада мамлакатларнинг 2010 ва 2025 йиллардаги олтин қазиб олиш ҳажмлари ўзаро таққосланган. Маълумотлар World Gold Council статистикасига асосланган бўлиб, 2025 йил декабр ҳолатига келтирилган.

Хитой ҳар икки даврда ҳам дунёдаги энг йирик олтин ишлаб чиқарувчи давлат мақомини сақлаб қолган. Мамлакатда йиллик олтин қазиб олиш ҳажми 2010 йилдаги 351 тоннадан 2025 йилда 384 тоннага етган.

Россияда эса ўсиш анча юқори бўлган. 2010 йилда мамлакатда 203 тонна олтин қазиб олинган бўлса, 2025 йилга келиб бу кўрсаткич 345 тоннага етган. Натижада Россия жаҳон рейтингида бешинчи ўриндан иккинчи ўринга кўтарилган.

Австралия ҳам дунёдаги энг йирик олтин ишлаб чиқарувчилар қаторида қолди. Бироқ мамлакат рейтингда иккинчи ўриндан учинчи поғонага тушган. Шунга қарамай, Австралияда олтин қазиб олиш ҳажми ўсиб, 2025 йилда 293 тоннани ташкил этган.

Шу тариқа, 2025 йилда Хитой, Россия ва Австралиянинг ўзи жами 1 минг тоннадан ортиқ олтин қазиб олган.

Айни пайтда сўнгги 15 йилда олтин бозорининг анъанавий етакчиларидан айримлари ўз мавқеини сезиларли даражада йўқотди.

Хусусан, АҚШда олтин қазиб олиш ҳажми 2010 йилдаги 231 тоннадан 2025 йилда 157 тоннагача камайган. Натижада мамлакат жаҳон рейтингида учинчи ўриндан еттинчи ўринга тушиб қолган.

Жанубий Африка Республикасида пасайиш янада кескин бўлди. Мамлакатда олтин қазиб олиш ҳажми 15 йил ичида икки баробардан кўпроқ қисқариб, 210 тоннадан 99 тоннага тушган.

Бу ўзгариш айниқса ЖАР учун аҳамиятли. Чунки мамлакат тарихан жаҳон олтин саноатининг энг йирик марказларидан бири ҳисобланган. Янги рақамлар эса глобал олтин қазиб олиш географияси тобора ўзгариб бораётганини кўрсатади.

Канада эса аксинча, энг катта ўсиш қайд этган давлатлардан бири бўлди. 2010 йилда мамлакатда 102 тонна олтин қазиб олинган бўлса, 2025 йилга келиб ишлаб чиқариш 213 тоннага етган.

Яъни Канада 15 йил ичида олтин қазиб олишни икки баробардан кўпроқ оширган ва жаҳон рейтингида саккизинчи ўриндан тўртинчи ўринга кўтарилган.

Гана ҳам ўз мавқеини сезиларли даражада мустаҳкамлади. Мамлакат олтин қазиб олиш ҳажмини қарийб икки баробар ошириб, 2025 йилда 187 тоннага етказган. Бу натижа Ганага жаҳон рейтингида олтинчи ўринни эгаллаш имконини берган.