АҚШ сенати иммиграция бўйича тўртта қонун лойиҳасини рад этди

АҚШ сенати иммиграция бўйича тўртта қонун лойиҳасини рад этди, деб хабар бермоқда Reuters.

Лойиҳалардан бирортаси ҳам керакли бўлган 60 овозни тўплай олмади. Кўриб чиқилаётган вариантлар орасида АҚШ президенти Дональд Трамп томонидан таклиф этилган қонун лойиҳаси, шунингдек, Республикачилар ва Демократлар партияси томонидан биргаликда тайёрланган лойиҳа ҳам бор эди.

Оқ уй тўртта лойиҳа муваффақиятсизликка учраганидан сўнг иммиграция ислоҳоти муҳокамасини АҚШ конгресси вакиллар палатасига олиб ўтишни таклиф қилди.

Эслатиб ўтамиз, аввалроқ АҚШ президенти Дональд Трамп твиттерда АҚШ иммиграция ислоҳотининг устувор йўналишларини маълум қилганди. “Менинг маъмуриятим хавфсиз, замонавий ва қонуний иммиграция тизимини яратиш учун учта асосий устувор йўналишни белгилаб олди: чегаранинг тўлиқ таъминланиши, занжирли миграция тўхтатилиши ва виза лотереяси бекор қилиниши”, деб ёзди Трамп.