Мирзиёев: Тожикистон билан муносабатларни стратегик даражага кўтарамиз

Тошкент Душанбе билан муносабатларни барча йўналишларда изчил ривожлантириб боради. Бу ҳақда 9 март куни Душанбега икки кунлик давлат ташрифи билан келган Ўзбекистон президенти Шавкат Мирзиёев маълум қилди.

Тожикистон президенти Имомали Раҳмон ва Ўзбекистон раҳбари Шавкат Мирзиёев «бир плюс бир» шаклидаги учрашув бошланишидан аввал матбуот учун қисқача баёнот берди.

«Тожикистон-Ўзбекистон муносабатлари яқин вақт ичида стратегик шериклик даражасига чиқади. Тошкент Душанбе билан муносабатларни барча йўналишларда изчил ривожлантириб боради», - дея айтиб ўтди Шавкат Мирзиёев.

Ўз навбатида, Имомали Раҳмоннинг маълум қилишича, Тожикистон Ўзбекистоннинг минтақавий ҳамкорликни ривожлантириш бўйича ташаббусларини барча томонлама қўллаб-қувватлайди.

Айни дақиқаларда «Қасри миллат» қароргоҳида бўлиб ўтаётган «яккама-якка» шаклдаги учрашувда икки томонлама сиёсий, савдо-иқтисодий, инвестициявий, молиявий, транспорт-коммуникация, туристик, маданий-гуманитар ва минтақалараро ҳамкорликни ривожлантириш, фуқароларнинг ўзаро ташрифини соддалаштириш масаласи, минтақавий ҳамда халқаро муаммолар муҳокама этиляпти.

Учрашувдан сўнг етакчиларга икки давлат ҳукумат делегациялари қўшилади.