Словакия полицияси 13 март куни Михаловце шаҳрида келиб чиқиши италиялик бўлган маҳаллий тадбиркор Антонин Вадални қўлга олди. Таъкидлаш жоизки, икки ҳафта олдин ўлдириб кетилган журналист Ян Куциак Вадалнинг словакиялик сиёсатчилар билан алоқалари ҳақида мақолалар ёзган.
Полиция 26 февралга ўтар кечаси Братислава яқинида жойлашган қишлоқдаги уйлардан бирида Куциак ва унинг қайлиғи Мартина Кушнированинг отиб кетилган жасадларини аниқлашган. ОАВ маълумотларига кўра, Куциак охирги вақтда словакиялик сиёсатчиларнинг “Ндрангета” италян мафиоз гуруҳи вакиллари билан алоқаларини тергов қилган.
“Италия суд идоралари бизга Антонин Вадални халқаро уюшган жиноий гуруҳ томонидан содир этилган жиноятлар билан боғлиқ ҳолда топширилиши илтимоси билан мурожаат қилди. Уни қўлга олиш жараёни максимал овоза қилинмасдан амалга оширилди”, деб айтган Словакия прокуратураси вакили.
Таъкидланишича, хабарда айтилаётган жиноят гиёҳванд моддалар билан боғланган. Полиция томонидан ушбу иш бўйича 17 киши қўлга олинган.
Марҳум журналист охирги 20 йил давомида Словакиянинг шарқида яшаган Вадал ва яна бир неча италияликлар ҳақида мақолалар ёзган. Жумладан, у Вадал билан бизнес юритишда Словакия хавфсизлик кенгаши котиби Вилиам Ясань ва бош вазир маслаҳатчиси Мария Трошкова ҳамкорлик қилганларини маълум қилган. Уларнинг иккиси ҳам бир неча кун аввал ўз лавозимларидан бўшаганлар.
Аввалроқ журналист ўлдирилгани ҳақидаги хабар пайдо бўлгандан кейин Антонин Вадал ва яна 6 нафар италиялик полиция томонидан қўлга олинган. Бироқ қўлга олинганлар уларга қарши далиллар етарлимаслиги сабабли бир кун ўтгач қўйиб юборилганлар.
