Оқ уйда катта тозалаш бошланиши кутилмоқда – ОАВ

АҚШ президентининг миллий хавфсизлик бўйича янги маслаҳатчиси Жон Болтон Қўшма Штатлар етакчиси Дональд Трампга қарши фикрда бўлган ўнлаб ходимларни ишдан бўшатиб юборади. Бу ҳақда Foreign Policy нашри бир неча манбаларга асосан хабар қилмоқда.

Нашр маълумотларига кўра, Болтон ва унинг қатор ҳамкасблари АҚШ Миллий хавфсизлик бўйича кенгашида «катта тозалаш»га тайёргарлик кўрмоқда, унинг доирасида у Оқ уйдаги кўплаб ходимларни ишдан ҳайдашга бел боғлаган. Хабар берилишича, миллий хавфсизлик бўйича янги маслаҳатчи ишни АҚШ собиқ президенти Барак Обама маъмурияти давридан қолган ходимлардан бошламоқчи.

«Болтон тозалашни амалга ошириши мумкин, ҳамда у буни қилади», - дея айтиб ўтди манба.

Бошқа бир манбанинг маълум қилишича, Болтон миллий хавфсизлик бўйича собиқ маслаҳатчи Герберт Макмастер томонидан лавозимга тайинланган деярли барча ходимни ишдан ҳайдамоқчи.

«Обама вақтида Оқ уйда пайдо бўлган барча ўз нарсасини йиғиштиришни бошлаши керак», - дея айтиб ўтди манба.