Кемероводаги “Зимняя вишня” савдо марказида ёнғин ҳақида сигнал олингандан кейин бу ҳақда огоҳлантирувчи тизимни ўчириб қўйган қўриқчи қўлга олинди. Бу ҳақда Россия тергов қўмитаси вакили Светлана Петренко маълум қилди.
25 март куни ушбу савдо марказида юз берган ёнғинда 64 киши ҳалок бўлди. Шифохоналарда 13 киши қолмоқда.
“Ёнғин бўйича 5 гумонланувчи, жумладан хусусий қўриқлаш корхонаси ходими ушланиб, сўроқ қилинди”, деб айтган Петренко.
Петренконинг айтишича, терговчилар ёнғин маркази жойлашган хонани ижарага олган шахс, савдо марказига эгалик қилувчи компания техник директори, ёнғин сигнализациясига хизмат кўрсатган ташкилот ходими ва раҳбарини сўроқ қилганлар.
Маълум қилинишича, қўриқчига нисбатан жиддий жиноий жазо тайинланиши мумкин.
“Қўриқчининг ҳаракатлари Жиноят кодексининг “Ёнғин хавфсизлиги талабларини бузиш” моддаси бўйича таснифланиши мумкин. Бу жиноят оғир ҳисобланади ва уни амалга оширганлик учун 7 йилгача озодликдан маҳрум этиш жазоси тайинланишини мумкин”, деб айтган Петренко.
Кемероводаги ёнғин Самара ички ишлар бошқармасидаги (1999 йил, 57 қурбон), Краснодар ўлкасидаги қариялар уйидаги (2007 йил, 63 қурбон) ва Пермдаги “Хромая лошадь” клубидаги (2009 йил, 153 қурбон) ёнғинлар билан бир қаторда Россияда охирги 100 йил ичида юз берган 4 та йирик ёнғиндан бири бўлди.
