УХХ Россия Бош штабини терактни ташкиллаштиришда айблади

Украина хавфсизлик хизмати Россия Бош штабини Киевдаги «Эспрессо» телеканали биноси олдидаги терактни ташкил этишда айблади, унинг натижасида Олий рада депутати Игорь Мосийчук жабрланган. Бу ҳақда РИА «Новости» хабар бермоқда.

«Жиноят ташкилотчиси – шахси аниқланмаган эркак киши бўлиб, у Россия Қуролли кучлари бош бошқармаси вакилидир. Ушбу шахс Россиядан Украинага келиб, бу ерда 2017 йилнинг 9 сентябридан 11 сентябригача ва 2017 йилнинг 10 октябридан 15 октябрига қадар бўлган», - дея маълум қилди Украина хавфсизлик хизмати раҳбари ўринбосари Виктор Кононенко.

Кононенконинг шунингдек хабар беришича, ишда яна тўрт киши бор, улардан уч нафари – украиналиклар, уларнинг шахси аниқланган. Улардан икки нафари, терговчилар маълумотига кўра, теракт ижрочилари ҳисобланади ҳамда Россия ҳудудида яширинмоқда. Украинанинг яна бир фуқароси бу иш бўйича қўлга олинди ва қамоққа жойлаштирилди. Барча уч нафар шахсга гумонланувчи расмий мақоми берилган.

Қўлга олинган эркакка «инсонларнинг ҳалок бўлишига олиб келган терактга кўмак кўрсатиш» ва «портловчи қурилмаларни ноқонуний равишда сақлаш ҳамда ишлаб чиқариш» айблови қўйилган бўлса, бошқа иккиси «жамоат арбоби ҳаётига хавф туғдириш», «террорчилик акти» ва «қуролни ноқонуний сақлаш» моддаси билан гумонланмоқда. Тергов Россияга ушбу иш бўйича шахсларни топшириш борасида мурожаат этишни режалаштирмоқда.

Киев прокурори ўринбосари ҳужум сабабларини айтмади, бироқ «олинган маълумотга кўра, айнан Мосийчук уларга керак бўлгани»ни таъкидлаб ўтди.