Самарқанд вилояти делегацияси Хитойда келишувларга эришди: инвестициялар ва туристлар жалб қилинади
|23:29 / 11.04.201810 37210 мин
Самарқанд вилояти ва Хитойнинг Шэнси провинцияси ишбилармон доиралари ўртасида икки томонлама савдо-иқтисодий ва инвестициявий алоқаларни кенгайтириш мақсадида Сиан шаҳрида халқаро бизнес-форум ва тақдимотлар ўтказилмоқда.
Вилоят ҳокими Туробжон Жўраев бошчилигидаги делегация шу кунларда Хитой Халқ Республикасининг Шэнси провинциясида бўлиб турибди, деб хабар бермоқда Kun.uz’га вилоят ҳокимлиги матбуот хизмати.
8 апрель куни Самарқанд вилояти ва Шэнси провинцияси ишбилармонлар доиралари икки томонлама савдо-иқтисодий ва инвестициявий алоқаларни кенгайтириш мақсадида вилоят ҳокими бошчилигидаги делегация аъзолари Сиан шаҳридаги халқаро логистика марказида вилоятнинг инвестицион имкониятлари ҳамда экспорт салоҳияти мавзусида бизнес-форум ўтказди.
Тадбирда Сиан шаҳрининг вице-мэри, жаноб Гао Гао, Шэнси провинцияси ташқи ишлар департаменти масъул ходимлари ҳамда йирик ишбилармон вакиллари иштирок этишди.
Сианлик ишбилармонлар томонидан катта қизиқиш билан қабул қилинган бизнес-форум савол-жавобларга бой бўлди. Тақдимот якунида Самарқанддан ташриф буюрган 26 нафар тадбиркор ва Шэнси провинциясидан иштирок этган компаниялар вакиллари ўзаро музокара олиб боришди.
Ташрифнинг биринчи кунида қиймати 23,6 млн. долларлик тўғридан-тўғри инвестиция жалб қилиш ҳисобига 3та лойиҳани амалга ошириш бўйича келишувлар имзоланди.
Жумладан, «Sam Eco Root» МЧЖ корхонаси негизида қизилмия экстракти ва кимёвий маҳсулотлар ишлаб чиқариш лойиҳасини амалга оширишда «Liaoning Sindpond Titanium Industry» компанияси қиймати 12,6 млн. долларлик тўғридан-тўғри инвестицияни йўналтириш бўйича меморандум имзоланди.
«Оптима Собиржон» МЧЖ негизида медицина соҳасида бир марта ишлатиладиган латекс қўлқоплар ишлаб чиқариш лойиҳасини амалга ошириш учун «CTMTS» компаниясидан қиймати 1 млн. долларлик асбоб-ускуналарни сотиб олиш бўйича шартнома имзоланди.
«Самарқанд кимё» акциядорлик жамияти негизида кимёвий ўғитлар ишлаб чиқариш лойиҳасини амалга оширишда «Liaoning Sindpond Titanium Industry» компанияси томонидан қиймати 10 млн. долларлик тўғридан-тўғри инвестицияларни йўналтириш бўйича меморандум имзоланди.
Мавзуга оид
Тадбир давомида Сиан шаҳри вице-мэри самарқандлик тадбиркорларга ўз маҳсулотларини сотишлари учун Сиан қуруқлик портидан алоҳида савдо майдончаси ажратилишини ҳамда ушбу савдо майдончаси учун ҳеч қандай тўлов ундирилмаслигини таъкидлади.
Бундан ташқари, туризм бўйича ҳам ўзаро алоқаларни мустаҳкамлаш юзасидан музокаралар ўтказилди. Тадбирда иштирок этган Самарқанддаги сайёҳлик агентликларининг таклифлари маъқулланиб, бир қатор шартномалар имзолашга эришилди.
Мазкур тадбир давомида Самарқанд иқтисодиёт ва сервис институти ва Сиан шаҳри университети ўртасида туристик агентлиги ташкил этиш тўғрисида ҳужжатлар имзоланди.
* * *
Шу куни Самарқанд вилояти ҳокими Туробжон Жўраев бошчилигидаги делегация аъзолари Шэнси провинцияси губернатори жаноб Лю Гочжунг ва унинг савдо-иқтисодиёт, инвестиция, таълим ва маданият соҳалари бўйича ўринбосарлари ҳамда бошқа масъуллар иштирокида учрашув ўтказди.
Учрашувда жаноб Лю Гочжун Ўзбекистон Республикасининг 2017-2021 йилларга мўлжалланган Ҳаракатлар стратегиясининг барча йўналишлари бўйича олиб борилаётган ислоҳотлардан хабардор эканлиги, бу ислоҳот Ўзбекистон халқининг фаровонлигини таъминлашга хизмат қилишини алоҳида таъкидлади.
Губернатор, ўз навбатида, Шэнси провинцияси ва Самарқанд вилояти ўртасида ҳар томонлама муносабатларни тубдан яхшилаш ва фойдаланилмаётган имкониятларни ишга солишга алоҳида урғу берди. Бунда икки томонлама битимни янада такомиллаштириш ва уни сафар давомида имзолашни таклиф қилди.
* * *
Шунингдек, Самарқанд вилояти ҳокими Туробжон Жўраев раҳбарлигидаги делегация аъзолари Сиан шаҳри мэри, жаноб Шангуан Цзинг билан учрашди. Учрашувда вилоят ҳокими томонидан Ўзбекистонда 2018 йил «Фаол тадбиркорлик, инновацион ғоялар ва инвестицияларни қўллаб-қувватлаш йили» деб эълон қилинганига алоҳида урғу бериб, ушбу йўналишда Давлат дастури қабул қилингани ҳақида батафсил маълумот берилди.
Шунингдек, тарихий обидаларга бой ҳисобланган Самарқанд шаҳри туризм инфратузилмасини ривожлантириш мақсадида яқин кунларда қурилиши мўлжалланаётган «Самарқанд Сити» лойиҳалари амалга оширилаётгани ва бунда Сиандаги компаниялар иштирокини қўллаб-қувватлашга тайёр эканлигини билдирди.
Сиан шаҳри мэри, ўз навбатида, Самарқанд ва Сиан шаҳарлари ўртасида ўрнатилган биродарлик алоқаларининг янги босқичга ўтганлигини чуқур мамнуният билан изоҳлади. Бу борада туризм, таълим ва маданият соҳасида ўзаро ҳамкорликда жиддий ёндашиш истагини билдириб, яқин кунларда мэриянинг савдо бошқармаси бошлиғи раҳбарлигидаги делегацияни Самарқандга юборишини маълум қилди.
* * *
Куннинг иккинчи ярмида Сиан ва Самарқанд шаҳарларининг «Биродарлашув битими» имзоланганлигининг 5 йиллиги муносабати билан шаҳардаги катта театр биносида Самарқанд ва Сиан маданият ва санъат усталари иштирокида байрам дастури намойиш этилди.
Ушбу тадбирда Сиан шаҳри вице-мэри, Шэнси провинцияси ҳамда шаҳар фаоллари, Сиандаги олий ўқув юртларида таҳсил олаётган ўзбекистонлик талабалар ҳамда уларнинг сафдошлари иштирок этди.
Тадбир иштирокчилари байрам дастурини кўтаринки руҳда қабул қилди. Яқин дўстлик муносабатлари фото ва видео тасвирларга олинди.
* * *
Самарқанд вилоят ҳокими Т.Жўраев бошчилигидаги делегация аъзолари 9 апрель куни Хитойнинг «Shaanxi Coal & Chemical Industry group Co., LTD» корпорацияси фаолияти билан яқиндан танишди.
2004 йилда асос солинган мазкур корпорациянинг асосий фаолият тури кўмир, кимёвий ўғитлар, электр энергияси ишлаб чиқаришдан иборат. Корпорациянинг йиллик ўртача кўмир ишлаб чиқариш қуввати 140 млн. тонна, электр энергия ишлаб чиқариш эса 44 млн. кВт.соатни ташкил қилар экан.
Шунингдек, мазкур корпорация йўл ва кўприклар қуриш, цемент ва бошқа қурилиш материаллари ишлаб чиқариш билан ҳам шуғулланади. Ишлаб чиқарган маҳсулотлари ички ва ташқи бозорга етказиб берилади.
Корпорация таркибига 60та корхона киради, уларда жами 102 минг киши фаолият кўрсатади.
Самарқанд вилоятидан борган делегация аъзолари Сиан шаҳридаги «BYD» корпорациясига ташриф буюриб, электромобиллар ишлаб чиқариш жараёни билан танишди.
Шу куни «China Volant Industry Corporation» корпорацияси раҳбарияти билан ҳам учрашув ўтказилди. Корпорация менежери Ван Сичэн амалга оширилаётган ишлар бўйича батафсил маълумот берди.
Ушбу корпорация қишлоқ хўжалиги соҳасида турли хилдаги технологияларга асосланган иссиқхоналар жиҳозлари ишлаб чиқариш ва ўрнатиш билан шуғулланади.
«Zhongtong Bus & Holding Co., Ltd» компанияси раҳбарияти билан ҳам музокара олиб борилди. Мазкур компания ташкил этилганига 40 йил тўлган. Бугунги кунда бу ерда 4000 мингдан кўпроқ ишчи-ходим меҳнат қилади.
Компания асосан шаҳарлараро ва туристик автобуслар ишлаб чиқаради. Ҳозир юздан ортиқ моделда автобус ишлаб чиқарилмоқда. Биргина 2017 йилда 20 мингта ҳар хил моделда автобус тайёрланган, 3000дан ортиғи экспорт қилинган. 2018 йилнинг ўтган даврида эса 2000 мингтаси экспортга жўнатилган.
Компания бугунги кунгача Ўзбекистондаги туристик ташкилотларга юздан ортиқ автобус сотган. Шундан келиб чиқиб, мамлакатимиз, жумладан Марказий Осиё давлатлари бозорига туристик автобуслар етказиб бериш компаниянинг асосий мақсади экани таъкидланди.
Учрашувда компания таъсисчилари Ўзбекистонга ташриф буюриб, автомобилсозлик бўйича ҳамкорлик қилиш тўғрисида «Ўзавтосаноат» акциядорлик жамияти раҳбарияти билан музокара ўтказиш истаги борлигини билдирди.
9 апрель кунги ўтказилган учрашувлар ва олиб борилган музокаралар натижасига кўра, жами 20 нафар тадбиркор томонидан Хитойнинг 18та компаниялари ўртасида умумий қиймати 88,9 млн. долларга тенг бўлган 17та шартнома ва меморандум имзоланди.
Шундан:
- ҳамкорликда ишлаб чиқариш лойиҳалари ташкил этиш бўйича 6та келишувга эришилиб, тўғридан-тўғри жалб қилинадиган инвестицияларнинг умумий қиймати 32,6 млн. долларни ташкил этади;
- маҳсулотлар экспорти бўйича 1,9 млн. долларлик 2та шартнома тузилди;
- ишлаб чиқариш ускуналарини харид килиш учун 12та корхона томонидан 17та лойиҳа бўйича 52,8 млн. долларлик шартнома имзоланди.
Самарқандлик тадбиркорлар Сиан халқаро молия маркази биносида маҳаллий ишбилармонлар билан ҳам учрашишди. Тадбирда вилоятнинг туристик салоҳияти тўғрисидаги тақдимоти ўтказилди.
Тақдимотда Самарқанддан ташриф буюрган тадбиркорлар ва Сиан шаҳри ишбилармонлари иштирокида музокаралар олиб борилди.
Музокаралар якуни бўйича қиймати 6 млн. долларлик, шу жумладан, 4,5 млн. долларлик тўғридан-тўғри хорижий инвестицияларни жалб қилиш бўйича лойиҳаларни ҳамкорликда амалга оширишга келишилди.
Жумладан;
- «Браво мадад» оилавий корхонаси негизида меҳмонхона хизмати фаолиятини йўлга қўйиш бўйича «Shaanxi Teenfo Imp & Export» компанияси томонидан 500 минг долларлик инвестиция киритиш бўйича меморандум имзоланди;
- вилоятдаги маданий объектларни замонавий дизайн асосида тунги ёритиш тизимини жорий этиш бўйича Хитой компанияси томонидан 4 млн. долларлик тўғридан-тўғри инвестиция киритиш лойиҳасини амалга оширишга келишилди.
Шунингдек, Хитой Халқ Республикаси мусулмонлари ассоциацияси раиси билан ўтказилган музокаралар якунига кўра, зиёрат туризми йўналишида ҳар йили ўртача 100 минг нафар зиёратчиларни Ўзбекистонга, жумладан, Самарқандга жўнатиш юзасидан дастлабки келишувларга эришилди.
