11 апрель куни кечқурун Brent нефтининг нархи 2014 йилнинг ноябридан буён биринчи марта бир баррель учун 73 долларга етди. Reuters агентлиги шу ҳақида хабар берди.
Бу воқеа фонида АҚШ томонидан россиялик олигархлар, амалдорлар ва топ-менежерларга нисбатан киритилган санкциялар сабаб юзага келган ҳолат - рублнинг пасайиши тўхтади.
"Чоршанба куни кечқурун рубль қиймати пастлигича қолмоқда, бироқ нефть нархи ошиши натижасида юзага келган воқеа сабаб у ҳаддан ташқари пасайиб кетиш хавфидан йироқлашди", дейилади агентликда.
Москва вақти билан соат 19:45 да Brent нефти Лондон ICE биржасида бир баррель учун 72,07 долларни ташкил қилди. Доллар курси - 62,51 рубль, евро курси эса - 77,36 рубль дея қайд қилинди.
11 апрель куни кундузи АҚШ президенти Дональд Трампнинг Сурияга ҳужум қилиш ниятидан сўнг доллар 2016 йилнинг 30 ноябридан буён биринчи марта 65 рубль кўрсаткичидан ошди. Евро 2016 йилнинг 10 мартидан максимумгача - 80,5 рублгача кўтарилди.
