Венесуэлада миллий валютага муқобил валюта чиқарилди

Венесуэла миллий валютаси боливарнинг кескин қадрсизланиши Венесуэладаги маҳаллий ҳокимиятларни боливарга муқобил янги валюталар чиқаришга мажбур қилмоқда. 15 апрелда Каракас мэрияси карибе деб номланган ўзининг валютасини чиқарди.

Шаҳар раҳбари Эрика Фариас карибе аҳолини иқтисодий уруш шароитида ҳимоя қилишга ёрдам беришини айтган. Globovision канали маълумотларига кўра, ушбу валютадан 5, 10, 50 ва 100 карибе қийматидаги купюралар муомалага чиқарилган. Бир карибе 1000 боливарга тенг бўлиб, унинг қора бозордаги курси жуда оз қийматни ташкил қилади. Унга кўра, 100 карибе тахминан 20 центга тенгдир.   

Бу валюта Венесуэлада гиперинфляция ва нақд пул тақчиллиги сабабли чиқарилган биринчи валюта эмас. Март ойида Элорса шаҳри ўзининг элорса деб номланган валютасини чиқарган. 2017 йил декабрда эса Каракасдаги Катия тумани коммуналаридан бири ўзининг паналь деб номланган валютасини чиқарган. 

Мураккаб иқтисодий вазият Венесуэлада улкан инфляцияга олиб келди. Ҳозирда долларнинг қора бозордаги курси 483,7 минг боливарни ташкил қилмоқда, ваҳоланки расмий курс бўйича бир доллар 44,6 минг боливарга тенг. Шу билан бирга мамлакатда нақд пул массаси етишмаяпти, шу сабабли ҳукумат яқинда 100 минг боливар қийматдаги купюра чиқарди. Унинг қиймати бор-йўғи 0,2 долларни ташкил қилади. 4 июнда боливарнинг деноминация қилиниши белгиланган. Янги купюралардан учта нол олиб ташланади.