«Мен шу ердаман. Сизлар билан», — деб ёзган Мачадо 25 октябр куни X ижтимоий тармоғида.
DW хабарига кўра, 59 ёшли сиёсатчининг қайтганини унинг сафдоши, президентликка собиқ номзод Эдмундо Гонсалес Уррутиа ҳам тасдиқлаган. У бу кунни венесуэлаликлар учун жуда муҳим деб атаган. Мачадонинг аниқ қаерда экани ва қайтиш тафсилотлари ҳозирча ошкор қилинмаган.
Бундан уч кун аввал, 22 октябрда Венесуэлада минглаб намойишчилар Мачадонинг қайтишини талаб қилган эди. AFP маълумотига кўра, Каракасда қарийб икки минг киши кўчага чиққан, айримлари сайлов ўтказиш талаби ёзилган плакатларни кўтариб олган. Колумбия билан чегарадош Тачира штатида ҳам шундай акция бўлиб ўтган.
Мачадо 2024 йилдаги баҳсли президентлик сайловидан кейин яшириниб яшаган ва 2025 йил декабрида Венесуэлани махфий равишда тарк этган.
AFP эслатишича, у ёғоч балиқчи қайиғида мамлакатдан чиқиб кетаётганда умуртқаларидан бири синган. Нобел тинчлик мукофотини топшириш маросими учун Норвегияга етиб боргач, Ослодаги шифохоналардан бирига ётқизилган. Мукофотни унинг номидан қизи қабул қилган.
АҚШ Давлат департаменти аввалроқ Каракас ҳукумати ва мухолифат ўртасидаги музокараларнинг навбатдаги босқичи якунланганини маълум қилган. Николас Мадуро АҚШ томонидан қўлга олинганидан кейин ҳукуматга вақтинча Делси Родригес раҳбарлик қилмоқда.
Давлат котиби Марко Рубио Мачадонинг хавфсиз қайтиши учун шароит яратилганини АҚШ қўллаб-қувватлаётган ярашув музокараларининг бевосита натижаси деб баҳолаган. Хабарда қайд этилишича, музокаралар давомида юзлаб сиёсий маҳбуслар озод қилинган, яна юзлаб мухолифатчилар муҳожирликдан қайтган.
Венесуэлада 2024 йилги президентлик сайловидан кейин ҳукумат Николас Мадурони ғолиб деб эълон қилган эди. Мухолифат эса натижаларни тан олмай, энг кўп овозни ўз номзоди Эдмундо Гонсалес Уррутиа олганини билдирган.
Мадуро январ бошида Каракасда АҚШ ҳарбийлари томонидан қўлга олиниб, Ню-Йоркка олиб кетилган. Унга, жумладан, «наркотерроризм» бўйича айбловлар қўйилган.
