Ўзбекистон The Wall Street Journal ва Heritage Foundation миссиясини таклиф қилади

Ўзбекистон The Wall Street Journal ва Heritage Foundation миссияларини Иқтисодий эркинлик индексидаги ўз позициясини яхшилаш бўйича чораларни муҳокама қилиш учун таклиф қилади. Бу Иқтисодиёт вазирлиги томонидан тайёрланган халқаро рейтингларда республика ўрнини яхшилаш бўйича «Йўл харитаси» билан назарда тутилган.

Май ойида Heritage Foundation билан учрашувлар ўтказилиб, унда Ўзбекистон паст кўрсаткичларга эга бўлган Индексни тузиш методологиясини ўрганиш режалаштирилган.

Дастлаб, The Wall Street Journal ва Heritage Foundation’нинг миссиясини Ўзбекистонга таклиф этиш, 2019 йил сентябрь ойида эса ушбу компанияларнинг офисларига ташриф буюриш режада бор.

Натижада, Ўзбекистон ҳозирги пайтда 152-ўринни эгаллаб турган Иқтисодий эркинлик индексидаги ўз позициясини яхшилаши керак.

Ўзбекистоннинг 12 кўрсаткич бўйича ўртача балли 51,5%ни ташкил этди, бу ўтган йилгидан 0,8 фоиз пунктига камроқ. Шу билан бирга, мулк ҳуқуқини ҳимоя қилиш, солиқ юки, бизнес эркинлиги, монетар эркинлиги ва меҳнат эркинлиги каби кўрсаткичлар яхшиланди. Бироқ, рейтинг ҳокимиятнинг ҳалоллиги, ҳуқуқни муҳофаза қилиш тизимининг самарадорлиги, молиявий фаровонлик, савдо соҳасидаги эркинлик кўрсаткичлари бўйича пасайди.

Ҳисоботда қайд этилишича, Ўзбекистон иқтисодиёти асосан ҳукумат томонидан назорат қилинади, бироқ сўнгги ислоҳотлар ишбилармонлик муҳитини яхшилади.

152-ўрин - рейтингдаги энг ёмонларидан бири. Мисол учун, Қозоғистон - 41, Қирғизистон - 78, Тожикистон - 106, Афғонистон - 154, Туркманистон – 169 ўринда.