30 сентябр куни FlyDubai авиакомпаниясининг Дубайдан Исроил пойтахти Тел-Авивга парвозни амалга оширган йўловчи самолёти Саудия Арабистонига фавқулодда қўнди. Самолёт парвоз бошланганидан бир ярим соат вақт ўтганида авария сигналини юборган: дастлаб халқаро умумий фавқулодда вазият сигнали бўлган 7700 коди, бироз ўтиб эса ноқонуний аралашув ёки самолётни эгаллаб олиш ҳақида хабар бериш учун қўлланадиган 7500 коди узатилган. Худди шу вақтда самолёт йўналишдан оғган ва кескин пасая бошлаган: у бир дақиқадан камроқ вақт ичида баландликни тенг ярмига йўқотган. Исроил теракт эҳтимоли туфайли қирувчи самолётларни ҳавога кўтарган. Аммо якунда самолёт алоқага чиққан ва Саудиянинг Тобук шаҳридаги аэропортга қўнган.
Исроиллик расмийлар самолёт учувчилари ўртасида муштлашув юзага келгани ҳақида маълум қилди. Самолёт йўловчилари орасида бўлган Мариям исмли аёл i24News нашрига аввалига учувчилар кабинасидан қичқириқ овози эшитилгани, кейин эса кабина эшиги очилиб кетгани ва йўловчилар ичкарида қон тўкилганига гувоҳ бўлишганини айтиб берган. У учувчилардан бирига пичоқ билан жароҳат етказилганини маълум қилган. Жабрланган учувчига йўловчилар орасидаги шифокор ва ҳамшира томонидан тез тиббий ёрдам кўрсатилган. Йўловчилар орасида фуқаролик кийимидаги учувчилар ҳам бор эди ва айнан улар самолёт бошқарувини қўлга олишган ва уни Тобукка олиб келишган.
Учувчилардан бири самолётни қулатмоқчи бўлгани ҳақидаги версия текширилмоқда. Иккинчи учувчи ҳаво кемаси капитанига пичоқ билан бир неча бор зарба берган. Тахминларга кўра, айнан у бошқарувни ўз қўлига олишни ва самолётни бортдаги барча йўловчилар билан бирга қулатишни хоҳлаган. Бу ўзини ўлдиришга уриниш ёки теракт мақсадидаги ҳаракат бўлгани аниқ эмас. Бир неча йўловчи ва экипаж аъзолари учувчилар кабинасига кириб боришган ва уни тўхтатишган, деб хабар берган исроиллик журналист Амит Сегал. У мазкур самолёт ичида олинган ва кийими қонга беланган эркак суратини намойиш этган.
Аввалига учувчилар Россия ва Украина фуқаролари экани ҳақида хабарлар тарқалганди. Россия пропагандаси аллақачон бу маълумотни кенг тарқатди (Владимир Соловёвнинг телеграм-каналида «Украиналик бўлган ииккинчи учувчи россиялик капитанга бир неча бор пичоқ билан жароҳат етказгани» ҳақида ёзилган), аммо бу маълумот тасдиқланмади. Айрим хабарларга кўра, самолётда чиндан ҳам украин ва рус миллатига мансуб учувчилар бўлган, лекин улар учувчилар кабинасида эмас, йўловчилар орасида бўлишган.
