АҚШнинг Ал-Қудсдаги элчихонаси ёнидаги чорраҳага Дональд Трамп номи берилади

Ал-Қудсдаги АҚШ элчихонаси ёнидаги чорраҳа келаси ҳафта очилади ва унга АҚШ президенти Дональд Трамп номи берилади. Бу ҳақда Ал-Қудс мэри Нир Баркат маълум қилди.

Чорраҳа «президент Дональд Трамп шарафига АҚШ майдони» деб номланади. Куни кеча бўлажак элчихона ёнида йўл белгилари ўрнатилди.

«Ал-Қудс Исроилни қўллаб-қувватлаётган АҚШ президенти ва фуқароларига ўз муҳаббатини шундай изҳор этмоқда. Президент Трамп Ал-Қудсни яҳудий халқи пойтахти сифатида тан олишга қарор қилди, у тарихий ҳақиқатни қўллаб-қувватламоқда», - дея маълум қилди мэр.

АҚШнинг Исроилдаги элчихонаси Тель-Авивдан Ал-Қудсга 2018 йилнинг 14 май куни кўчирилади. У Ал-Қудсда ишлаётган Америка бош консулхонаси биносида очилади.