Санкт-Петербургнинг «Зенит» клуби натижаси аҳамиятсиз бўлган ўйинда «СКА-Хабаровск»ни қабул қилди ва 6:0 ҳисобида майдон эгалари фойдасига ҳал бўлди.

Кўк-оқ-кўклар сафида Александр Ерохин покерни расмийлаштирди, Себастьян Дриусси ва Антон Заболотный биттадан гол уришди.

Роберто Манчини «Зенит» бошқарувида охирги ўйинни ўтказди, шунингдек, бу ўйин жамоа сардори Доменико Кришито учун питерликлар сафидаги охирги ўйин бўлди.

Бу йирик ғалабадан кейин «Зенит» очколари сонини 53тага етказди ва РФПЛ турнир жадвалида бешинчи ўринни эгаллади. «СКА-Хабаровск» 13 очкоси билан чемпионатни охирги ўринда якунлади.

Муддатидан олдин чемпионликни нақ қилган «Локомотив» бу турда Туланинг «Арсенал» жамоасига мағлуб бўлди. 

Тулада кечган учрашув майдон эгаларининг 2:0 ҳисобидаги ғалабаси билан якунланди. Ўйиндаги голларга Артём Дзюба ва Кантемир Берхамов муаллифлик қилишди. Пойтахтликлар жамоаси ўйинни бир киши кам бўлиб якунлади — 86-дақиқада иккинчи сариқ карточкадан кейин Соломон Кверквелия майдонни тарк этди. 

«Локомотив» мавсумни 60 очко тўплаган ҳолда биринчи ўринда якунлади, «Арсенал» 42 очко тўплаб турнир жадвалида 7-ўринни олди.

Бу тур ўйинларидан кейин иккинчи, учинчи ва тўртинчи ўрин соҳиблари ҳам аниқ бўлди.

Аутсайдер «Анжи»ни ўз уйида Аҳмед Муса ва Витиньонинг голлари эвазига мағлуб этган (2:1) ЦСКА иккинчи ўринни эгаллади ва кейинги мавсумда «армиячилар» ЕЧЛ гуруҳ босқичида тўғридан-тўғри иштирок этадиган бўлишди, мавсум якунларига кўра 24 очко билан 13-ўринни эгаллаган «Анжи» эса «Амкар» билан биргаликда ўтиш ўйинларида иштирок этади (ФНЛнинг 3-4 ўринларини эгаллаган жамоаларга қарши).

«Спартак» охирги турда «Динамо»га ютқазди (0:1) ва чемпионатни учинчи ўринда якунлади. Москваликлар жамоаси кейинги мавсумда ЕЧЛда иштирок этиш учун саралаш босқичида иштирок этиши керак.

Тўртинчи ўрин «Краснодар»га насиб этди, бу жамоа охирги турда «Рубин» билан очколарни бўлишиб олди (1:1) ва кейинги мавсумда Европа лигасида иштирок этадиган бўлди.

Бу турда «Уфа» «Тосно»ни қабул қилди. «Нефтяник» стадионида кечган учрашув майдон эгаларининг 5:0 ҳисобидаги ғалабаси билан якунланди. Ўйиндаги голлар Дмитрий Живоглядов (дубль), Дмитрий Сысуев, Сильвестр Игбун ва Иван Пауревич номига ёзилди.

Бу йирик ғалабадан кейин «Уфа» 43 очко жамғарган ҳолда Россия чемпионати турнир жадвалида олтинчи ўринни эгаллаб, Европа лигасида иштирок этиш ҳуқуқини қўлга киритди. Таркибида ўзбекистонлик футболчи Вагиз Галиулин асосий етакчи бўлган «Тосно» эса 24 очкоси билан қолиб, 15-ўринни эгаллади ва РФПЛни тарк этди. Қайд этиш керакк, Россия Кубогининг жорий мавсумдаги ғолиби бўлмиш «Тосно» бу ўйинда ғалаба қозонганида дивизионда қолиши мумкин эди, 14-ўрин учун рақобатчи «Анжи» параллел кечган учрашувда ЦСКАга мағлуб бўлди (1:2).