Интеллектуал мулк агентлиги муаллифлик ҳуқуқи бузилиши учун жаримани кескин ошириш таклифи билан чиқди

Интеллектуал мулк агентлиги муаллифлик ҳуқуқининг бузилиши учун жаримани бир неча баробарга ошириш таклифи билан чиқди. Тегишли қонун лойиҳаси норматив-ҳуқуқий ҳужжатларнинг муҳокамаси порталида эълон қилинди.

Агентлик Маъмурий жавобгарлик тўғрисидаги кодексга, хусусан, 277-модда («Товар белгиси ёки хизмат кўрсатиш белгиси эгасининг ҳуқуқларини бузилиши»)га ўзгартириш киритиш таклифи билан чиқди.

Ҳозирда жазо фуқароларга ЭКИҲнинг 1 баробаридан 3 баробаригача, мансабдор шахсларга эса - 3 баробаридан 5 баробаригача жарима солинишини назарда тутади.

Қонун лойиҳаси фуқаролар учун жарима миқдорини ЭКИҲнинг 5 баробаридан 10 баробаригача, мансабдор шахсларга эса - 10 баробаридан 20 баробаригача ўзгартиришни таклиф қилмоқда.

Жарима солинганидан сўнг бир йил давомида такроран содир этилган ҳуқуқбузарлик учун – фуқароларга ЭКИҲнинг 10 баробаридан 20 баробаригача, мансабдор шахсларга – 20 баробаридан 30 баробаригача.

Бундан ташқари, Агентлик кодексни иккита янги модда билан тўлдиришни таклиф қилмоқда:

•  Муаллифлик ҳуқуқи ва турдош ҳуқуқларнинг бузилиши (177-1) – фуқароларга жарималар ЭКИҲнинг 1 баробаридан 5 баробаригача, мансабдор шахсларга – 5 баробаридан 10 баробаригача, мусодара этиш билан. Такрорий қонун бузилиши учун – 5 баробардан 10 баробаргача, мансабдор шахсларга – 10 баробардан 20 баробаргача.
•  Ихтиро, фойдали модель, саноат намунасига ҳуқуқларнинг бузилиши (177-1) – фуқароларга жарима ЭКИҲнинг 5 баробаридан 10 баробаригача, мансабдор шахсларга – 10 баробардан 20 баробаргача. Такрорий бузилиш учун – ЭКИҲнинг 10 баробаридан 20 баробаригача, мансабдор шахсларга – 20 баробардан 30 баробаргача.

Қонун лойиҳасини 6 июнь кунигача муҳокама қилиш мумкин. 28 август куни кучга кириши режалаштирилган.