DW хабарига кўра, Киев вилояти ҳарбий маъмурияти раҳбари Тимур Ткаченко Вишгородда вайроналар остидан эркак, аёл ва яна бир бола тирик олиб чиқилганини маълум қилган. Уларга тиббий ёрдам кўрсатилмоқда.
Ткаченконинг айтишича, вилоятнинг Вишгород туманида бир нечта хусусий уй зарарланган ва вайрон бўлган. Турар жой ҳамда гаражларда ёнғинлар чиққан.
Буча туманида учта хусусий уй, 11 та автомобил ва иккита омборхона зарарланган. Бу ҳудудда ҳам ёнғин юз берган. Шунингдек, Буча, Вишгород ва Обухов туманларидаги инфратузилма объектларида ҳужум оқибатлари қайд этилган.
Киевнинг ўзига ҳам шу кеча баллистик ракеталар билан зарба берилган. Шаҳар мэри Виталий Кличконинг маълум қилишича, Святошин туманида хусусий турар жойлар ҳудудида, Оболон туманида дўконда, Голосеев туманида эса омбор биносида ёнғин чиққан.
Кличко Киевда икки киши жабрланганини, улардан бири — аёл шифохонага ётқизилганини билдирган.
Киев ва унинг атрофи бир неча кундан бери ҳужумга учрамоқда
27 сентябр куни Киев яқинидаги Софиевская Боршчаговка қишлоғида жойлашган «Столичний» бозорига дрон урилган. Украина расмийларига кўра, икки киши ҳалок бўлган, яна 10 киши яраланган. Шу куни Киевнинг бир нечта тумани ҳам дронлар ҳужумига учраб, ўнлаб одам жабрланган.
28 сентябрга ўтар кечаси Украина пойтахтига яна дронлар билан ҳужум қилинган ва бир неча киши яраланган. Кундузи эса Украина Миллий фанлар академияси биноси зарбага учраб, кучли ёнғин чиққан. Кличко 28 сентябрдаги ҳужумлар оқибатида Киевда икки киши ҳалок бўлгани ва 26 киши жабрланганини маълум қилган.
29 сентябрга ўтар кечаси ҳам пойтахтга ракета ва дронлар билан зарба берилган. Ракета парчалари турар жой яқинига, дрон эса йўлнинг қатнов қисмига тушган. Ўша ҳужумда ҳалок бўлганлар ёки жабрланганлар ҳақида маълумот келиб тушмаган.
