Ўзбекистонда илғор хориж тажрибасини (ХХР, Грузия, ГФР, Буюк Британия, Франция, Австрия ва бошқа давлатлар) ҳисобга олиб, ҳайдовчиларни жавобгарликка тортадиган ва рағбатлантирадиган замонавий балли тизим жорий этилади. Бу 2018-2022 йилларда Ўзбекистон Республикасида йул ҳаракати хавфсизлигини таъминлаш концепциясини 2018-2019 йилларда амалга ошириш бўйича "Йўл харитаси"да назарда тутилган.
Хусусан, қуйидагиларни назарда тутадиган балл тўплаб бориш тизимини жорий этишга қаратилган норматив-ҳуқуқий ҳужжат лойиҳаси тайёрланади:
ҳар йили ҳайдовчилик гувоҳномасига 12 балл ёзиш. Бу баллар қоидабузарлик турига қараб камайиб боради (яъни, агар ҳайдовчининг қоида бузиши 12 баллга етса, у ҳайдовчилик ҳуқуқидан маҳрум этилади);
балл тизимини қўллашда дифференциал ёндашув (яъни, жарима баллари Йўл ҳаракати қоидалари қанчалик оғир бузилганлигига қараб белгиланади);
муайян вақт ичида Йўл ҳаракати қоидаларини бузмаган ҳайдовчиларни рағбатлантириш механизмларини жорий этиш.
