Украина шарқида Малайзия авиакомпаниясига тегишли Boeing йўловчи самолётини уриб туширган ракета Россияга тегишли бўлмаган. Бу ҳақда Россия президент Владимир Путин айтди.
“Албатта, йўқ. Бу фожианинг бир нечта версияси бор, жумладан бу ракета Украина армиясиники бўлгани, самолёт ва шу кабилар”, деб жавоб қилган Путин “Йўловчи самолёт уриб туширилган ракета Россияга тегишли бўлганми?” деган саволга.
24 май куни халқаро тергов гуруҳи МН17 рейсини бажарган самолётнинг қулаши бўйича оралиқ натижаларни тақдим қилди. Терговнинг таъкидлашича, самолёт Россия қуролли кучларининг 53-зенит-ракета бригадасига тегишли “Бук” мажмуасидан уриб туширилган.
“Бу фожианинг бир неча версияси мавжуд, бироқ ҳеч ким уларни ҳисобга олмаяпти. Шу сабабли, агар тўлақонли тергов бўлмаса, унда бизнинг иштирокимизсиз ишлаётган комиссиянинг хулосаларини қабул қилишимиз жуда қийин бўлади”, деб айтган Путин.
Россиянинг таъкидлашича, Россиянинг самолётнинг ҳалокатга учрашига алоқадорлиги баландпарвоз гаплардир, тергов эса нохолис ва бир томонлама олиб борилмоқда. Путиннинг айтишича, Москва терговда иштирок этсагина, унинг натижаларини тан олади. Россия президентининг таъкидлашича, у бошидан тергов бўйича биргаликда ишлашни таклиф қилган, бироқ бу жараёнга қўйилмаган. Шу билан бирга Украина жанговар ҳаракатлар борган ҳудуд устидаги ҳаво ҳудудини ёпмаганига қарамай бу терговда иштирок этмоқда, деб қўшимча қилган Путин.
