АҚШ мудофаа вазири Жеймс Мэттис Жанубий Корея ва Япониядан бўлган ҳамкасблари билан минтақадаги вазият ҳамда Сингапурда ташкиллаштирилган АҚШ-КХДР саммити якунларини муҳокама қилди. Бу ҳақда Пентагон матбуот котиби Дана Уайт баёнотида айтилади.
«Қўшма Штатлар Япония олдидаги ўзининг бузилмас мудофаа мажбуриятлари ва кучларнинг минтақадаги жанговар тайёргарлигини қўллаб-қувватлашга қатъий бел боғлаганини яна бир бор тасдиқлади. Улар (мудофаа вазирлари - таҳ.) минтақавий тинчлик ҳамда барқарорликни таъминлаш йўлида қалин ҳамкорлик қилишга ваъда беришди», - дейилади хабарда.
Жанубий Корея мудофаа вазири Сон Ён Му билан мулоқотда қўшма ҳарбий машқлар масаласи ҳам муҳокама қилинган.
«Вазир Мэттис ва вазир Сон амалга оширилаётган дипломатик саъй-ҳаракатларга биргаликда қўллаб-қувватлов тақдим этишни муҳокама қилди. Бунда президентнинг АҚШ ва Жанубий Корея қўшма ҳарбий машқлари бўйича кўрсатмаларини бажариш учун биргаликда ишлаш ҳам кўриб чиқилди. Вазир Мэттис АҚШ ва Жанубий Корея иттифоқи бузилмас эканини тасдиқлади. Ҳар икки томон ҳам минтақавий тинчлик ҳамда барқарорлик йўлида қалин ҳамкорлик қилишга келишиб олди», - дея қўшимча қилиб ўтди у.
Эслатиб ўтамиз, аввалроқ Хитой, Япония ва Жанубий Корея КХДР бўйича ягона позицияга эга экани хабар қилинганди.
