Муроджон Аҳмадалиев ҳам ғалаба қозонди

Бугун, 15 июль куни тонгда Рио-2016 Олимпиадаси ва жаҳон чемпионати совриндори Муроджон Аҳмадалиев ўзининг навбатдаги жангида аргентиналик Луис Фернандо Молинага қарши рингга чиқди.

Аргентиналик Луис Фернандо Молина унинг профессионал рингдаги учинчи рақиби эди. 6 раундга мўлжалланган жанг тўлиқ давом этди ва ўзбекистонлик спортчи жангни очколар ҳисобига кўра ўз фойдасига ҳал қилди.

Аҳмадалиев бунгача проф рингда иккита жанг ўтказиб уларнинг ҳар иккисида ҳам муддатидан олдин ғалаба қозонганди. Молина эса 12та жанг ўтказган, шундан 7тасида ғалаба қозонган (2тасида нокаут), 4та жангда мағлуб бўлган, бир жангда дуранг қайд этганди.

Бунгача Рио-2016 Олимпиадаси чемпиони Фазлиддин Ғоибназаров америкалик боксчи Кевин Жонсонга қарши рингга кўтарилиб, ҳакамлар қарорига кўра ғолиб деб топилган, Ўзбекистоннинг яна бир вакили, Рио-2016 Олимпиадаси​ финалчиси Шаҳрам Ғиёсов эса мексикалик Даниэль Эчеверрияни биринчи раунддаёқ нокаутга учратганди.