61 ёшли ҳинд миллиардери, Reliance Industries саноат гуруҳи раҳбари Мукеш Амбани Alibaba Group асосчиси, хитойлик Жек Мани ортда қолдириб, илк бор Осиёнинг энг бой одами номини олишга муваффақ бўлди. Бу ҳақда Bloomberg ахборот агентлиги хабар берди.
Маълумотларга кўра, ҳозирда Амбанининг бойлиги 44,3 млрд долларни, Маники эса 44 млрд долларни ташкил қилмоқда. Амбани ўзининг бойлигини Reliance Jio Infocomm Ltd. телекоммуникация тармоғини кенгайтириш ва нефть-кимё соҳасидаги активларини икки ҳисса ошириш ҳисобига кўпайтира олди.
Мукеш Амбани 1957 йилда Яманнинг Аданида туғилган. У собиқ ўқитувчи, Ҳиндистонга полиэстер импорти ортидан бойиб кетган Дхирубхай Амбанининг ўғлидир.
Амбани 2000-йиллар бошида мобил коммуникациялар билан шуғуллана бошлаган, сўнгра нефть-газ, савдо-сотиқ бизнесини ривожлантирган.
Амбани дунёдаги энг катта хусусий уйга эга. Баландлиги 173 метрни ташкил қилувчи уй Мумбайда жойлашган. Унинг қурилишига 70 млн доллар сарфланган, бироқ ҳозирги бозор нархи 2 млрд долларга яқинни ташкил қилади. Осмонўпар бино Атлантика океанидаги афсонавий орол шарафига “Антилия” деб номланган.
Бино турли баландликдаги 27 та қаватдан иборат бўлиб, ҳар бир қават баландлиги, майдони ва нимага мўлжаллангани билан бошқасидан фарқ қилади. Бино 8 магнитудали зилзилага бардошли қилиб лойиҳаланган. Уйда зиналар йўқ, барча ҳаракатланишлар 9 та лифт ёрдамида амалга оширилади.
