Трамп нима учун Россияни рақиб деб аташни истамаслигини изоҳлади

АҚШ президенти Дональд Трамп Россиянинг армияси кучли бўлса-да, унинг иқтисодиёти нисбатан кичик эканлигини ва Россияга нисбатан «рақиб» сўзини ишлатишни истамаслигини айтди.

«Уларда кучли армия бор, лекин иқтисодиёти, биласизларки, Хитойникига нисбатан анча кам. Мен ҳаттоки «рақиб» (adversary) деган сўзни ишлатишни хоҳламайман. Биз барчамиз биргаликда ишлашимиз, буни чиройли тарзда амалга оширишимиз мумкин, ҳаммаси жойида бўлади ва тинч яшаймиз», — деди президент Fox News каналига берган интервьюсида.

Аввалроқ Трамп Россия раҳбари Владимир Путинни душман эмас, рақобатчи сифатида кўришини, вақти келиб дўстга айланиши ҳам мумкинлигини айтганди. Россия президентининг ташқи сиёсат бўйича ёрдамчиси Юрий Ушаков бунга жавобан Москва Трампни музокаралар бўйича ҳамкор сифатида кўришини билдирганди.

Ҳозирги пайтда АҚШдаги Россияга қарши сиёсатчилар Россияга нисбатан нафақат «рақиб», балки «душман» сўзини ҳам ишлатишмоқда ва Трампни бу сўзлардан фойдаланмаганлиги учун танқид қилишмоқда.

Маълумот берилишича, Россия иқтисодиёти Американикидан 13 марта ва Хитойникидан саккиз мартага кам.