Мирзо Бедил кўчасидаги «зебра» тикланди. Шу билан муаммо бартараф бўлди, деб ҳисобласак бўладими?

Кеча, 25 июль куни Самарқанд шаҳридаги Мирзо Бедил кўчасида бўёқлари ўчиб кетган пиёдалар ўтиш жойи ва синиб ётган йўл белгиси ҳақида «Болалар серқатнов йўлдаги «зебра»ни бўр билан қайта тикламоқчи бўлишди» сарлавҳаси остида репортаж эълон қилган эдик.

Самарқанд вилоят ИИБ ЙҲХБнинг Kun.uz’га маълум қилишича, мазкур чорраҳадаги ётиқ чизиқлар (зебра) қайтадан чизилган ва 1 дона етишмаётган 5.16.2 «Пиёдалар ўтиш жойи» йўл белгиси ўрнатилган.

 Шунингдек, мазкур кўчадаги яна иккита кичик чорраҳадаги пиёдалар ўтиш жойи ётиқ чизиқлари ҳам қайта тикланган.

Албатта, муаммоли ҳолат зудлик билан бартараф этилгани қувонарли ҳол. Лекин йўлларда пиёдалар хавфсизлигини таъминлаш борасида Самарқанд вилоят ИИБ ЙҲХБдан тизимли ва самарадорлиги юқорироқ ишлар амалга оширилиши талаб қилинади. Буни хабар остига шарҳ ёзган самарқандликларнинг фикрларидан ҳам билиб олса бўлади.

Масалан, мана шу кўчанинг юқорироғида Самарқанд таянч тиббиёт коллежи, ундан сал тепароқда Вилоят перинатал маркази олдидаги йўловчилар ўтиш жойининг ҳам бўёқлари ўчиб ётибди, у жойларда ҳам пиёдаларнинг йўлни кесиб ўтишида муаммолар юзага келмоқда ва аминманки, у ердаги «зебра»лар бўяб қўйилмаган.

Хуллас калом, бундай бўёғи ўчган пиёдалар ўтиш жойи шаҳарда жуда кўп. Модомики, уларнинг барчасининг бўёғи янгилаб чиқилса ҳам биринчи ёмғиргача чидаб беради, холос. Илк ёмғир ёғиши билан йўлдаги оқ буёқ ўчади, бу ёғи куз, қиш, баҳорнинг ёғин-сочинли кунларигача яна ўша аҳволга дуч келамиз.

Самарқандда ҳайдовчилик маданияти ўта паст эканлигини ҳам қайд этиш жоиз. Йўл белгиси турган бўлса ҳам, йўлда «зебра» оппоқ бўлиб кўриниб турган бўлса ҳам пиёдаларнинг устига машина ҳайдайдиган, уларга йўл бермайдиган, «зебра» устидан йўлни кесиб ўтаётган пиёдаларни бўралатиб сўкиб кетадиган ҳайдовчилар ҳам талайгина.

Энди буёғи ўчган «зебра» улар учун текис йўл дегани. Бундай жойлардан йўлни кесиб ўтаётган пиёдалар эса улар учун йўлдаги «помеха».

Вилоят ЙҲХБ бу ҳолатда нималар қилиши керак. Албатта, бу борадаги чет эл тажрибасига суяниши керак. Самарқанддек шаҳарда катта йўлларнинг ҳар 120–150 метрида пиёдалар ўтиш жойи бўлиши мақсадга мувофиқ саналади. Айни пайтда йўлларнинг ўртасидаги панжаралар олиб ташлангач, пиёдалар томонидан ҳам йўлларнинг қатнов қисмини дуч келган жойдан кесиб ўтиш ҳолатлари кўпаймоқда. Зеро, шаҳар йўллари, аввало, пиёдалар учун қулай бўлмоғи керак, ҳайдовчилар учун эмас.

Умуман, олийгоҳ, лицей-коллежлар, мактаб, мактабгача таълим муассасалари, спорт иншоотлари, туғуруқхонаю шифохоналар олдидаги пиёдалар ўтиш жойи хорижий давлатлардагидек, кўтарма пиёдалар ўтиш жойи билан жиҳозланиши шарт.

Пиёдалар ўтиш жойи ҳар қандай ҳайдовчини ўз автомашинаси тезлигини 15–20 км/соатгача туширишга мажбур қиладиган «ётиқ полициячи» билан таъминланган — бироз сатҳи кўтарилган ҳудуд бўлиши керак. Ана шунда:

1). Ҳайдовчилар бундай жойга яқинлашганида ўз тезлигини кескин камайтиришга мажбур бўлишади;

2). Пиёдалар ўтиш жойининг бўёқлари ўчиб кетса ҳам, йилнинг исталган фаслида пиёдалар ўтиш жойи йўловчилар учун хавфсиз ҳудудлигича қолаверади;

Самарқанд вилоят ЙҲХБ йўлларда пиёдаларнинг хавфсизлигини ошириш учун ҳафтанинг маълум бир кунида «Диққат, пиёдалар» тадбирини ташкиллаштириши, шаҳардаги пиёдалар ўтиш жойларида пиёдаларнинг хавфсизлигини таъминламайдиган, уларга йўл бермайдиган ҳайдовчиларни мунтазам жазолашлари, шаҳардаги чорраҳаларда жойлаштирилган LED экранларнинг барчасида пиёдаларнинг хавфсизлигини таъминлашни тарғиб қилувчи ижтимоий роликларни айлантириш, уларнинг намойиш этилишини кўпайтириш талаб этилади.

Шуҳрат Шокиржонов,

журналист