Венесуэлада энг кам иш ҳақи 60 мартага оширилди

Венесуэла президенти Николас Мадуро 17 августда “петро” криптовалютаси қиймати ва мамлакатда 20 августдан киритиладиган янги энг кам иш ҳақи миқдорини эълон қилди. Мамлакат 20 августдан янги, деноминация қилинган валюта – суверен боливарда муомала қилишга ўтади. 

Мадуронинг айтишича, бир “петро” 60 доллар ёки 3,6 минг янги боливарга (360 млн деноминация қилинмаган боливар) тенг бўлади. Шу билан бирга “қора бозор”даги доллар курси ҳозирда 5,9 млн эски боливарни ташкил қилмоқда. Амалдаги боливардан 5 та нол олиб ташланади.

Мамлакатдаги энг кам иш ҳақи ярим “петро”, яъни 1,8 минг янги боливар ёки 180 млн эски боливарни ташкил қилади. Бу эса энг кам иш ҳақининг кескин – 60 марта оширилишини англатади. Ҳозирда бу қиймат 3 млн боливарни ташкил қилмоқда.

Шунингдек, мамлакатда қўшилган қиймат солиғи 12 фоиздан 16 фоизгача кўтарилади. 

Аввалроқ Мадуро 20 августдан Венесуэлада 2 та валюта – боливар ва “петро” амал қилишини айтган. Шу билан бирга эски боливарлар ҳам тўлиқ муомаладан йўқолгунча амал қилади. Янги суверен боливар “петро”га боғлаб қўйилади. 

Венесуэла жорий йилнинг 20 февралида нефть билан таъминланган “петро” криптовалютасини муомалага киритиб, нефть захиралари билан қўллаб-қувватланувчи ўз криптовалютасига эга илк давлатга айланганди.