Карлуш Кейруш Ўзбекистон термасини Осиё кубоги фаворитлари қаторида санади

11 сентябрь куни Тошкентда Эрон миллий терма жамоасига қарши бўлиб ўтадиган ўртоқлик учрашуви олдидан матбуот анжумани бўлиб ўтди. Унда дастлаб меҳмон жамоа устози Карлуш Кейруш ва футболчи Масъуд Шожаи журналистларнинг саволларига жавоб қайтарди.

«Биз ЎФА билан ажойиб ва дўстона муносабатларга эгамиз. ЎФА ҳамиша ўртоқлик учрашуви ташкил қилишни сўраганимизда йўқ дейишмайди. Бундай ижобий ва самимий муносабат учун ташаккур.

Биз яхши шаклланган тажрибали футболчилардан ташкил топган кучли жамоага қарши тўп сурамиз. Бу баҳс биз учун катта тажриба бўлади деб ўйлайман. Эктор Купер қўл остида ажойиб футболчилар жамлангани шубҳасиз.

Биз Осиё кубогига тайёргарликни бошлаганмиз. Бу баҳсда тажрибали футболчилар билан бирга, Эрон терма жамоасининг эртаси бўлган ёшларга ҳам имконият берамиз.

Таъкидлаб ўтишни истардимки, жаҳон чемпионатидаги иштирок Осиё кубогида ёрдам бермайди. Бунинг учун биз тинимсиз меҳнат қилишимиз, футболчиларнинг иштиёқини оширишимиз шарт ва шундагина бизга чемпионлик насиб қилиши мумкин.

Осиё кубогига Жанубий Корея, Япония, Ўзбекистон терма жамоалари ҳам чемпионлик учун ташриф буюришади ва улар билан ўйинлар осон бўлмаслиги аниқ. Биз кўпроқ ишласаккина мақсадга етамиз.

Эрон терма жамоасида 7 йил ишлашимга сабаб бу футболчилар билан ўзаро ишончдир. Эрон билан ҳар хил натижаларга эришдик. Ижобий ва салбий.  Мен футболчиларга қанчалик ишонсам, улар ҳам менга шундай ишонч билан жавоб қайтаришади.

Эрон терма жамоаси футболчилари машғулот вақтида ҳам ўйин пайтида ҳам майдонга бир хил кучли иштиёқ ва шижоат билан чиқишади», дея Кейрушнинг сўзларини келтирган ЎФА матбуот хизмати.

11 сентябрь куни ФИФА кунлари доирасида Ўзбекистон миллий терма жамоаси Эрон термасига қарши майдонга тушади.

Баҳсга Тошкентдаги «Миллий» стадиони мезбонлик қилади. Учрашув эса маҳаллий вақт билан 20:00 да бошланади.

Эслатиб ўтамиз, Эктор Купер бошчилигидаги Ўзбекистон миллий терма жамоаси аргентиналик мутахассиснинг дебют ўйинида Сурияга қарши майдонга тушиб, 1:1 ҳисобидаги дуранг қайд этганди.