Кениялик марафончини мусобақа вақтида машина уриб юборди

Кениялик енгил атлетикачи Жозеф Кипроно Киптум Колумбиянинг Меделинида ўтган яриммарафонни (21 км 97,5 метр) якунлай олмади. Мусобақада етакчилик қилган 30 ёшли Кипроно марра чизиғига яқин қолганда автомобил томонидан уриб юборилган.

Спортчига биринчи ёрдам кўрсатилгач, шифохонага етказилган. Енгил атлетикачи лат ейиш ва кесик жароҳатлари олган, унинг аҳволи хавотирли эмас. 

Маълум қилинишича, автомобил ҳайдовчиси йўл белгилари талабларига риоя қилмай, марафончилар югураётган йўлга чиқиб кетган. Марафонни эса бошқа бир кениялик –  Даниэль Муинди Мутети ютган.

Таъкидлаш жоизки, Кипроно 2015 йилда ушбу яриммарафонда ғолиб бўлган.