10 август куни Колумбия ғарбида, Чоко департаментида кучли зилзила рўй берди. АҚШ Геология хизмати унинг кучини 7,4 магнитуда этиб баҳолаган.

«Биз ҳозиргина жиддий сейсмик ҳодисани бошдан кечирдик. Бизни афтершоклар хавотирга солмоқда. Зилзила маркази Сан-Хосе-дел-Палмар шаҳрида бўлса-да, пойтахт Кибдода вайронагарчиликлар рўй берган ва биноларга жиддий зарар етган. Биз зарар кўламини баҳолаяпмиз», – дейди Чоко губернатори Нубия Кордоба-Кури.

Маҳаллий нашрлар қутқарувчиларга таяниб хабар беришича, Чокода бир киши ҳалок бўлиб, 10 киши жароҳат олган.

Зилзила Чоко департаментидан ҳудуди билан чекланмаган. Ижтимоий тармоқларда Калдас департаменти маркази бўлган Манисалес шаҳрида ҳам зилзила бўлгани ҳақидаги видеолар тарқалган. Видеолардан бирида кўча бўйидаги бинолар силкинаётгани ҳамда шаҳар соборидаги миноралардан бири вайрон бўлгани акс этган.

Вале-дел-Каука департаментидаги Кали шаҳрида эса 20 га яқин бино қулаган, маҳаллий расмийлар харобалар остида одамлар қолиб кетган бўлиши мумкинлигини айтмоқда.

Колумбия пойтахти Боготада ҳам ер ости силкинишлари қайд этилган. Гувоҳларга кўра, зилзила афтершоклар билан беш дақиқага яқин вақт давом этган. Қўшни Эквадорда ҳам силкиниш кучини сезишган.

Июн ойи охирида Колумбияга қўшни бўлган Венесуэлада бир дақиқа ичида иккита вайронкор зилзила рўй берган, бунинг оқибатида олти мингдан ортиқ киши ҳалок бўлган, камида 60 минг киши жабрланганди.